Напрыканцы агульнай аўдыенцыі, якая адбылася 4 жніўня 2010 г. у Апостальскай Сталіцы, Святы Айцец Бэнэдыкт XVI заклікаў вернікаў да салідарнасці з народам Расіі ў сувязі з прыроднымі пажарамі. Таксама Папа заахвоціў прысутных да малітвы за жыхароў Пакістана і Афганістана, на якія абрынуліся моцныя паводкі.

«Мае думкі зараз аб народах, якія ў гэты перыяд закрануты буйнымі прыроднымі катастрофамі, што прынеслі чалавечыя ахвяры, раненні, матэрыяльны ўрон, пакінулі без даху над галавой многіх людзей, — адзначыў Пантыфік. — Перш за ўсё я думаю аб вялікіх пажарах у Расійскай Федэрацыі і аб спусташальных паводках у Пакістане і Афганістане».

Папа дадаў, што моліцца аб ахвярах гэтых катастрофаў і выказвае духоўную блізкасць з тымі, хто сутыкнуўся з бедствамі. Святы Айцец таксама папрасіў Бога аб падтрымцы людзей, якія ў дадзены момант перажываюць цярпенні і цяжкасці.