Святога Айца Бэнэдыкта XVI паядноўваюць асаблівыя сувязі з музыкай Вольфганга Амадэя Моцарта. Таксама і ўчора, 7 верасня 2010 г., у летняй рэзідэнцыі Папы ў Кастэль Гандольфа адбыўся канцэрт, падрыхтаваны для Пантыфіка Папскай Акадэміяй навук. У канцэрце прагучаў «Requiem» аўстрыйскага кампазітара.

«Кожны раз, калі слухаю яго музыку, не магу не звярнуцца думкамі да майго парафіяльнага касцёла, дзе, калі быў маленькім хлопчыкам, кожную нядзелю чуў яго Імшу, — адзначыў пасля канцэрта Святы Айцец. — Усім сэрцам я чуў, як да мяне дакранаўся прамень нябеснага хараства; гэтае ўражанне вяртаецца з кожным разам, як і сёння, калі я слухаў гэтае вялікае і драматычнае разважанне аб смерці».

Папа выказаў перакананне, што атмасфера музыкі Моцарта, у якой «усё прабывае ў гармоніі, з’яўляецца дарам ласкі Божай, але таксама і плёнам жывой веры Моцарта». Па словах Пантыфіка, кампазітар «асабліва ў сваёй сакральнай музыцы здолеў даць светлы адказ Божай любові, якая дае надзею, нават тады, калі жыццё чалавека раздзіраюць цярпенне і смерць».

Пры гэтым Папа працытаваў фрагмент ліста Моцарта да паміраючага бацькі. «Гэты тэкст выяўляе глыбокую і простую веру, якая бачна таксама ў вялікай малітве „Requiem“, і адначасова дапамагае нам моцна любіць з’явы зямнога жыцця як дары Божыя і ўзносіцца над імі, гледзячы на смерць як на ключ да пераступлення парогу вечнага шчасця», — падкрэсліў Бэнэдыкт XVI.