Сёлета Італія адзначае 150-годдзе аб’яднання краіны. З гэтай нагоды 26 мая 2011 г. Святы Айцец Бэнэдыкт XVI здзейсніў акт прысвячэння Італіі Найсвяцейшай Панне Марыі. Цырымонія і малітва прайшла ў базыліцы «Santa Maria Maggiore».

«Вера ў Хрыста не прыводзіць да адчужэння ад свету, — адзначыў Папа. — Якраз наадварот, сустрэча з жыватворчым словам Евангелля аб’ядноўвае людзей, умацоўвае і абагачае іх сацыяльныя сувязі, знаходзіць сваё выражэнне ў культуры, мастацтве, дабрачыннай дзейнасці».

На думку Пантыфіка, Італія мае ўсе падставы, для таго, каб ганарыцца тым, што Каталіцкі Касцёл робіць у гэтай краіне. Аднак Святы Айцец звярнуў увагу біскупаў на актуальныя праблемы італьянскага грамадства, якія патрабуюць увагі з боку Касцёла: неабходнасць абароны жыцця і сем’яў, якія знаходзяцца ў складаных сітуацыях.