Маліцца за святароў і біскупаў, каб яны не паддаваліся спакусе грошай і ганарыстасці, але служылі Божаму Народу, заклікаў папа Францішак. Гамілію падчас ранішняй святой Імшы 15 мая Пантыфік засяродзіў на ўрыўку з Дзеяў Апосталаў, дзе святы Павел заклікае старэйшых Касцёла ў Эфесе пільнаваць сябе і ўвесь статак.

Гэта, паводле Святога Айца, адна з самых прыгожых старонак Новага Запавету, дзе паказваюцца цудоўныя адносіны біскупа са сваім народам. Папа нагадаў, што біскупы і святары пакліканы захоўваць, будаваць і абараняць давераны ім статак. «Біскуп не ёсць біскупам для самога сябе; ён для людзей, і святар не з’яўляецца святаром для сябе», — адзначыў Пантыфік, чые словы прыводзіць Ватыканскае радыё.

Адносіны біскупа і святара з народам Святы Айцец назваў «экзістэнцыяльнымі і сакрамэнтальнымі». «Мы маем патрэбу ў вашых малітвах», паколькі «нават біскупа і святара могуць атакаваць спакусы», — звярнуўся Папа да вернікаў, дадаўшы, што «мы людзі, і мы грэшнікі», «мы схільныя да спакусаў».

Папа Францішак спаслаўся на св. Аўгустына, які назваў дзве самыя значныя спакусы ў жыцці біскупа і святара: багацце і ганарыстасць. «Калі святар ці біскуп ідзе за грашыма, людзі не любяць яго, і гэта знак. Ён дрэнна скончыць», — сказаў Святы Айцец. Пантыфік нагадаў і пра дух «марнай славы і кар’ерызму», прысутнасць якога найбольш балючая для Касцёла.

«Маліцеся за нас, — паўтарыў Папа, — каб мы былі беднымі, каб мы былі пакорнымі, лагоднымі, каб служылі людзям. Маліцеся за нас, біскупаў і святароў».

(AG)