18–19 мая ў Рыме пройдзе Дзень свецкіх рухаў, новых супольнасцяў, асацыяцый і аб’яднанняў пад дэвізам «Я веру! Павяліч у нас веру». Для ўдзелу ў форуме зарэгістраваліся каля 120 тысяч чалавек са 150 рухаў з розных краін свету, у тым ліку і Беларусі. 19 мая ўдзельнікі сустрэчы збяруцца на Эўхарыстыі на плошчы Св. Пятра, якую ўзначаліць Папа.

«У пяцідзясятую гадавіну пачатку Другога Ватыканскага Сабору не магло не адбыцца (...) сустрэчы з той касцёльнай рэчаіснасцю, якая з’яўляецца плёнам гэтага Сабору», — сказаў арцыбіскуп Рына Фізікела, распавядаючы пра гэтае мерапрыемства. Іерарх дадаў, што форум пройдзе ў вігілію Пяцідзясятніцы «на знак прысутнасці Духа Хрыста Уваскрослага, які кіруе сваім Касцёлам і евангелізацыйнай справай».

Як інфармуе Ватыканскае радыё, у рамках правядзення Дня свецкіх рухаў 18 мая на плошчы Св. Пятра адбудзецца малітоўная сустрэча са сведчаннямі. Сярод тых, хто раскажа пра свой асабісты досвед сустрэчы з Хрыстом, арцыбіскуп Фізікела вылучыў ірландскага пісьменніка і журналіста Джона Вальтэра і пакістанскага ўрача Пола Бхаці, дарадчыка прэм’ер-міністра гэтай краіны па пытаннях нацыянальнай гармоніі. Да ўдзельнікаў чування далучыцца папа Францішак, які, між іншым, адкажа на некаторыя пытанні прадстаўнікоў свецкіх рухаў і аб’яднанняў.

(AG)