Новы даведнік са статыстычнай інфармацыяй пра Касцёл «Annuario Pontificio» прадставілі Святому Айцу 13 мая Дзяржаўны сакратар кардынал Тарчызіо Бэртонэ і субстытут Апостальскай Сталіцы арцыбіскуп Анджэло Бэчу. Даведнік распрацавала Цэнтральная статыстычная служба Святога Пасаду.

Як вынікае з даведніка, на які спасылаецца Ватыканскае радыё, на сённяшні дзень католікаў у свеце налічваецца 1214 мільёны чалавек, што на 1,5% больш у параўнанні з 2011 г. Католікі складаюць 17,5% ад усяго насельніцтва планеты. Найбольш інтэнсіўна іх колькасць расце ў Афрыцы (на 4,3% у параўнанні з 2011 г.) і ў Азіі (на 2%). У Еўропе і Амерыцы колькасць католікаў павялічылася толькі на 0,3%. Назіраецца таксама павелічэнне колькасці біскупаў. Ва ўсім свеце іх налічваецца 5132, што на 0,55% больш, чым ў 2010 г. Асабліва заўважна іх колькасць узрасла ў Акіяніі (на 4,6%) і Афрыцы (на 1%). 70% біскупаў паходзяць з Еўропы і Амерыкі.

Колькасць святароў і законнікаў на працягу апошніх 10 гадоў павялічылася на 2,1%, сёння іх 413 418 чалавек. Рост колькасці святароў адбываецца ў асноўным за кошт новых пакліканняў у Афрыцы (больш на 39,5%) і Азіі (на 32%). У Еўропе за апошнія 10 гадоў святароў стала менш на 9%.

Амаль на 40% павялічылася ў свеце колькасць сталых дыяканаў. Пазітыўная дынаміка датычыць у першую чаргу Еўропы, дзе іх стала больш на 43% . 97,4% усіх сталых дыяканаў прыходзіцца на Еўропу і Амерыку.

Колькасць законных братоў павялічылася ў Афрыцы (на 18,5%) і Азіі (на 44%), але паменшылася ў Еўропе (на 18%), Амерыцы (на 3,6%) і Акіяніі (на 21,9%).

Таксама за апошнія 10 гадоў у свеце амаль на 10% паменшылася колькасць законніц.

Новых кандыдатаў да святарства ў параўнанні з 2001 г. стала больш на 7,5 % і сёння налічваецца 120 616 чалавек. Рост колькасці семінарыстаў у асноўным адбываецца за кошт Афрыкі (тут іх стала больш на 30,9%) і Азіі (на 29,4%).

(AG)