Кардынал Антоніа Марыя Руока Варэла скіраваў Святому Айцу Бэнэдыкту XVI тэлеграму ў першую гадавіну правядзення Сусветных дзён моладзі ў сталіцы Іспаніі. У ёй арцыбіскуп Мадрыдскі назваў моладзевы форум «вялікай падзеяй ласкі» і падзякаваў Пантыфіку за тое, што выбраў Мадрыд для правядзення «гэтай глабальнай сустрэчы».

Арцыбіскуп паабяцаў, што Мадрыд і Іспанія ніколі не забудуць Папу, яго адданасць і прыхільнасць служэнню Евангеллю, яго дабрыню і блізкасць да ўсіх.

«Такім чынам, Святы Ойча, мы шлём бясконцае дзякуй», — адзначаецца ў тэлеграме. Як паведамляе Ватыканскае радыё, арцыбіскуп Мадрыдскі падзякаваў Папе таксама за яго ўпэўненасць, якая дапамагае Касцёлу ісці праз гэты свет да канчатковай сустрэчы з Панам, і паабяцаў маліцца за яго.