Святы Айцец зацвердзіў тэму і дату правядзення 50-га эўхарыстычнага кангрэса

Святы Айцец

23.09.2009 15:23

Бэнэдыкт XVI зацвердзіў тэму і дату правядзення 50-га Міжнароднага эўхарыстычнага кангрэса. Адбудзецца ён у Дубліне (Ірландыя) 10–17 чэрвеня 2012 г. Тэма пасяджэння — «Эўхарыстыя: камунія з Хрыстом, а таксама паміж намі». Як сцвярджаецца ў ватыканскім камунікаце, вынясенне гэтай тэмы на абмеркаванне звязана з 50-годдзем распачацця ІІ Ватыканскага Сабору, які, на думку арцыбіскупа Дубліна Дыярмуда Марціна, «з’яўляецца момантам аднаўлення і паглыблення навучання Касцёла, а таксама разумення яго як Цела Хрыста і Народу Божага». Тэма кангрэса была пачэрпнута з ключавога дагматычнага дакумента Сабору Канстытуцыі Lumen gentium, дзе сцвярджаецца: «Прымаючы сапраўдны ўдзел у Целе Пана, мы ўзносімся да супольнасці (камуніі) з Ім і таксама паміж сабою». Апостальская Сталіца адначасова інфармуе, што ў Дубліне ўжо створаны лакальны камітэт, заданнем якога з’яўляецца складанне зыходнага тэалагічнага тэксту, які павінен легчы ў аснову падрыхтоўкі да кангрэса ў 2012 г. Камітэт узначальвае арцыбіскуп Дубліна Дыярмуд Марцін.