Да падрыхтоўкі да святаў Божага Нараджэння з малітвай, міласэрнасцю і адкрытым сэрцам заклікаў Святы Айцец 2 снежня падчас Эўхарыстыі ў капліцы Дома св. Марты. Па словах Папы, у дні Адвэнту пачынаецца новае падарожжа на сустрэчу з Панам, і менавіта ў гэтым сэнс Божага Нараджэння.

Пантыфік адзначыў, што, калі адбываецца сустрэча з Хрыстом, Ён уносіць новае ў наша сэрца, душу, жыццё, і гэтае спатканне ніколі не адбудзецца, калі наша сэрца не будзе адкрытым. Папа дадаў, што для Хрыста мы не шэрая маса, “Ён глядзіць кожнаму ў твар, у вочы, бо Яго любоў – гэта не нешта абстрактнае, гэта любоў канкрэтная”.

Папа заклікаў вернікаў “даць Пану магчымасць любіць сябе”, а таксама прапанаваў рэцэпт добрай падрыхтоўкі да Божага Нараджэння. Паводле яго, падчас Адвэнту трэба прысвячаць больш часу на малітву – яна павінна быць настойлівай, – развівацца ў братэрскай любові, наблізіцца да тых, хто ў гэтым мае патрэбу, больш радавацца, праслаўляючы Пана.

“Малітва, дабрачыннасць і хвала”, з адкрытым на сустрэчу з Хрыстом сэрцам, — падсумаваў Папа свае парады.

Паводле беларускай рэдакцыі Ватыканскага радыё

(AG)