На трывожную з’яву ў Касцёле — катэгорыю заўсёды незадаволеных хрысціян — звярнуў увагу 13 снежня падчас Імшы Папа Францішак. Па словах Пантыфіка, гэта тыя, хто баіцца адчыніць дзверы для Святога Духа - адсюль іх стан пастаяннага смутку.

Папа нагадаў, што гэта была праблема фарысеяў, якім не падабаўся ні Ян Хрысціцель, бо “не есць, не п’е”, ні Езус, якога наадварот называлі “абжорай, п’яніцай, сябрам мытнікаў і грэшнікаў”. У іх, па словах Святога Айца, заўсёды была падстава для крытыкі таго, хто абвяшчае навіну пра Бога. “Яны аддалі перавагу схавацца ў рэлігіі больш складанай: у маральных запаведзях, як група фарысеяў, у палітычным кампрамісе, як садукеі, у сацыяльнай рэвалюцыі, як зелоты, у гнастычнай духоўнасці, як эсэі”, - нагадаў Папа, дадаўшы, што яны адчувалі сябе ў сваёй сістэме чыстымі і таму не прымалі прапаведнікаў, такіх, як Езус. “У народа Божага ёсць пэўная алергія на прапаведнікаў Слова: як, напрыклад, прарокі, якіх гналі і забівалі”, - звярнуў увагу Пантыфік.

Хрысціяне, якія “аддаюць перавагу жыццю ў клетцы сабой створаных запаведзяў, кампрамісаў, рэвалюцыйных планаў або сваёй бесцялеснай духоўнасці”, заўсёды незадаволеныя тым, што кажуць прапаведнікі ісціны, адзначыў Папа і дадаў, што такія людзі баяцца свабоды Святога Духа, якая спасылаецца праз пропаведзь. Пантыфік назваў гэта сумным фактам у жыцці Касцёла і запрасіў маліцца за гэтых людзей.

Паводле беларускай рэдакцыі Ватыканскага радыё

(AG)