Евангельскія благаслаўленні з’яўляюцца практычнай праграмай жыцця, адзначыў Папа Францішак падчас ранішняй Эўхарыстыі ў Ватыкане 9 чэрвеня. На наступны дзень пасля малітоўнай сустрэчы за мір у Святой Зямлі Пантыфік падкрэсліў, што трэба мець мужнасць дабрыні, каб пераадольваць нянавісць.

Нагорнае казанне Хрыста, паводле Святога Айца, дае адказ на пытанне аб тым, як стаць добрым хрысціянінам. Па словах Папы, евангельскія благаслаўленні, прамоўленыя ў гэтым казанні, знаходзяцца ў супярэчнасці з дамінуючай тэндэнцыяй сучаснага свету. “Свет не хоча плакаць, ён абмінае балючыя сітуацыі, хавае іх за чымсьці іншым. Толькі чалавек, які бачыць рэчы такімі, якія яны ёсць, і плача ў сваім сэрцы шчаслівы і будзе суцешаны суцяшэннем Езуса, а не свету”, - сказаў Пантыфік, дадаўшы, што гэта адносіцца і да тых, хто змагаецца з сучаснымі праявамі несправядлівасці, даруе іншым, ставіцца са зразуменнем да чужых памылак.

Папа востра раскрытыкаваў тых, хто распаўсюджвае плёткі, адзначыўшы, што іх дзеянні супярэчаць Хрыстоваму благаслаўленню: “Шчаслівыя міратворцы, бо яны сынамі Божымі названыя будуць”. “Свет плётак. Людзі, якія пляткараць, не ствараюць міру, з’яўляюцца ворагамі міру. Яны не шчаслівыя”, - сказаў Пантыфік.

Папа заклікаў часта звяртацца да фрагменту 5 раздзела Евангелля паводле Мацвея і прасіць Бога, каб дапамог зразумець Яго пасланне.

Паводле беларускай рэдакцыі Ватыканскага радыё

(AG)