Мір, які Бог Айцец хоча сеяць у свеце, варта берагчы і, больш за тое, здабываць, адзначыў Папа Францішак у разважаннях перад малітвай «Анёл Панскі» 1 студзеня.

Пантыфік нагадаў пра Сусветны дзень міру, які адзначаецца ў першы дзень года. Сёлета яго тэма - «Перамажы абыякавасць і здабудзь мір». Святы Айцец падзякаваў за шматлікія малітоўныя і дабрачынныя ініцыятывы на карысць міру.

Папа заклікаў сваіх слухачоў нанова адкрыць для сябе «аблічча Бога». У той жа час Пантыфік перасцярог ад успрыняцця Божага слова, як нейкай чароўнай палачкі. Творца, па словах Святога Айца, змяняе рэальнасць знутры, цярпліва і з любоўю, таму далікатна просіць у чалавека дазволу ўвайсці ў яго жыццё і, як дождж, спускаецца на зямлю, каб прынесці свой плён.

Папа адзначыў, што той мір, які Бог жадае пасеяць на зямлі, патрабуе намаганняў таксама з боку людзей, і гэта заўсёды звязана з духоўнай барацьбой, якая вядзецца на ўзроўні сэрцаў. Ворагам міру з’яўляецца не выключна вайна, але і абыякавасць, якая, як правіла, палягае на канцэнтраванні ўвагі толькі на сабе, стварэнні бар’ераў, падазронасці, страху і ізаляцыі, папярэдзіў Пантыфік.

Святы Айцец дадаў, што часам мы так засыпаны навінамі, што адрываемся ад рэальнасці, ад патрабуючых, якія знаходзяцца побач.

Паводле беларускай рэдакцыі Ватыканскага радыё

(AG)