«Няхай шчырая і трывалая вера св. Пятра, вялікае і ўсеабдымнае сэрца св. Паўла дапамогуць нам быць радаснымі хрысціянамі, адданымі Евангеллю і адкрытымі на сустрэчу з усімі», — пажадаў Папа перад малітвай «Анёл Панскі» 29 чэрвеня, ва ўрачыстасць свв. апосталаў Пятра і Паўла.

У сваім разважанні Пантыфік звярнуў увагу на абсалютную рознасць гэтых вучняў Хрыста, што вынікае з чытанняў Дзеяў Апосталаў: святы Пётр — «пакорлівы рыбак», святы Павел — «адукаваны настаўнік». «Аднак, калі тут, у Рыме, мы ведаем Езуса, калі хрысціянская вера з’яўляецца жывой і істотнай часткай духоўнай спадчыны і культуры гэтай тэрыторыі, то толькі дзякуючы мужнасці гэтых двух сыноў з Блізкага Усходу», — падкрэсліў Папа Францішак значнасць жыцця і місійнай дзейнасці апосталаў Пятра і Паўла. Папа дадаў, што з любові да Бога яны пакінулі сваю радзіму і, не зважаючы на цяжкасці і рызыкоўнасць доўгага падарожжа, накіраваліся ў Рым, каб прапаведаваць Евангелле і прыняць мучаніцкую смерць за сваю веру.

«Святыя Пётр і Павел сёння ўяўна вяртаюцца да нас, зноў праходзяць вуліцамі гэтага горада, стукаюць у дзверы нашых дамоў і сэрцаў», — сказаў Пантыфік. Апосталы, па словах Папы, «жадаюць яшчэ раз прынесці Езуса, Яго міласэрную любоў, суцяшэнне і спакой». «У гэтым мы маем вялікую патрэбу. Прымем жа іх пасланне! Зробім скарб з іх сведчання!» — заклікаў Святы Айцец.

Паводле беларускай рэдакцыі Ватыканскага радыё