Ён палюбіў айцоў тваіх і выбраў нашчадкаў іхніх пасля іх

Чытанне кнігі Другазаконня.

Майсей прамовіў да народа, кажучы:

Спытайся ў даўніх часоў, якія былі перад табою, ад таго дня, калі Бог стварыў чалавека на зямлі; ад аднаго краю нябёсаў аж да другога, ці было некалі штосьці такое вялікае, як гэта, і ці было вядома штосьці падобнае? Ці чуў народ голас Божы, які гаварыў з агня, як ты чуў, і застаўся жывы? Або ці спрабаваў некалі Бог прыйсці і выбраць сабе народ паміж іншага народу праз выпрабаванні, знакі і цуды, і вайну, моцнаю рукою і ўзнятым плячом, і праз чыны страшныя — праз усё тое, што зрабіў для вас Пан, Бог ваш, перад вашымі вачыма ў Егіпце?

Гэта было паказана табе, каб ты ведаў, што Пан ёсць Богам, і няма іншага, апроч Яго. З неба Ён даў табе пачуць свой голас, каб навучыць цябе, і на зямлі паказаў табе свой вялікі агонь, і ты чуў словы ягоныя з сярэдзіны агню, бо Ён палюбіў айцоў тваіх і выбраў нашчадкаў іхніх пасля іх. Ён сам вывеў цябе з Егіпта сваёй магутнай сілай, каб прагнаць перад табою большыя і мацнейшыя за цябе народы, і прывесці цябе, і даць табе ва ўладанне зямлю іх, як у сённяшні дзень.

Таму ведай цяпер і захоўвай у сэрцы сваім, што Пан ёсць Богам на небе ў вышыні і на зямлі ўнізе, і няма іншага. Захоўвай Яго пастановы і Яго запаведзі, што я наказваю табе сёння, каб добра было табе і тваім сынам пасля цябе, каб  доўгі быў твой век на зямлі, якую на ўсе дні дае табе Пан, твой Бог. 

Гэта слова Божае.

аРЭСПАНСАРЫЙНЫ ПСАЛЬМ

Рэфрэн: Буду ўспамінаць справы Твае, Пане.

12. Буду ўспамінаць справы Пана, *
буду ўспамінаць Твае даўнія цуды.
13. Буду разважаць над усімі чынамі Тваімі, *
думаць пра ўсе Твае справы.

Рэфрэн:

14. Божа, Твой шлях святы, *
які бог настолькі вялікі, як наш Бог?
15. Ты — Бог, які чыніць цуды, *
Ты аб’явіў народам сваю моц.

Рэфрэн:

16. Сваёй рукою Ты вызваліў народ свой, *
сыноў Якуба і Юзафа.
21. Як статак, вёў Ты народ свой *
рукой Майсея і Аарона.

Рэфрэн:
а

Год ІІ

ПЕРШАЕ ЧЫТАННЕ

Гора крываваму гораду

Чытанне кнігі прарока Навума.

Вось на гарах ступні таго, хто прыносіць добрую вестку і абвяшчае мір. Адзначай, Юдэя, святы свае, выконвай свае абяцанні, таму што больш не будзе нягоднік хадзіць па табе, ён знішчаны цалкам.

Бо Пан аднавіў веліч Якуба, як веліч Ізраэля, бо іх спусташальнікі знішчылі іх і паламалі вінаградныя галінкі іхнія.

Гора крываваму гораду, поўнаму падману і зла, дзе не спыняецца рабаванне. Свіст бізуноў і грукатанне колаў, галоп коней і хуткі бег калясніц. Вершнік рвецца, зіхцяць мячы і блішчаць дзіды, мноства палеглых і груды мёртвых, няма канца трупам, аж спатыкаюцца аб целы.

Я закідаю цябе мярзотамі, зраблю цябе пагардаю і выстаўлю на ганьбу. І кожны, хто цябе ўбачыць, адскочыць і скажа: Спустошана Нініва! Хто яе пашкадуе? Дзе знайду я суцяшальніка табе?

Гэта слова Божае.

аРЭСПАНСАРЫЙНЫ ПСАЛЬМ

Рэфрэн: Я забіваю і ажыўляю.

35. Блізкі дзень іх згубы, *
і спяшаецца іхні лёс да іх.
36. Але Пан будзе судзіць народ свой *
і злітуецца над слугамі сваімі.

Рэфрэн:

39. Цяпер бачыце, што Я, гэта Я існую, *
і няма Бога, апроч Мяне.
Я забіваю і ажыўляю, *
Я раню, і Я аздараўляю.

Рэфрэн:

41. Калі навастру меч бліскучы *
і прысуд выканае Мая рука,
то адпомшчу ворагам маім, *
адплачу тым, хто Мяне ненавідзіць. 

Рэфрэн:

СПЕЎ ПЕРАД ЕВАНГЕЛЛЕМ

Што дасць чалавек узамен за жыццё сваё?

+ Чытанне святога Евангелля паводле Мацвея.

У той час:

Езус сказаў сваім вучням: Калі хто хоча ісці за Мною, няхай адрачэцца ад сябе і возьме крыж свой, і ідзе следам за Мною. Бо той, хто хоча жыццё сваё зберагчы, загубіць яго, а хто загубіць жыццё сваё дзеля Мяне, той знойдзе яго. Бо якая ж будзе карысць чалавеку, калі ён здабудзе увесь свет, а жыццю свайму прынясе шкоду? Або што дасць чалавек узамен за жыццё сваё? Бо прыйдзе Сын Чалавечы ў славе Айца свайго з Анёламі сваімі, і тады аддасць кожнаму паводле ўчынкаў ягоных. Сапраўды кажу вам, што некаторыя з тых, хто стаіць тут, не скаштуюць смерці, пакуль не ўбачаць Сына Чалавечага, які ідзе ў Валадарстве сваім.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ