Кардынал Франчэска Кокапальмэрыа, старшыня Папскай рады па інтэрпрэтацыі заканадаўчых тэкстаў, аўтарытэтны спецыяліст па Кананічным праве, лічыць, што пасля адстаўкі Бэнэдыкта XVI, яго статус можа разглядацца як Біскуп Рыма на пенсіі, а яго тытул можа застацца такім, які выкарыстоўваўся да гэтага часу — Яго Святасць Бэнэдыкт XVI.

Афіцыйнага адказу на пытанне, што будзе з профілем Бэнэдыкта XVI у Твітэры пасля 28 лютага, пакуль няма. Верагодна, што акаўнт @Pontifex у перыяд sede vacante застанецца без змен, а пасля абрання новага Папы будзе прынята канчатковае рашэнне аб яго будучыні.

Рым рыхтуецца да прыняцця вялікай колькасці вернікаў і турыстаў у перыяд з канца лютага і да пачатку красавіка. Гэта звязана з жаданнем пілігрымаў з усяго свету ўдзельнічаць у апошніх мерапрыемствах, якія правядзе Святы Айцец Бэнэдыкт ХVI перад сыходам з Пасаду св. Пятра, а таксама з увагай да будучага канклаву і ўрачыстасці інтранізацыі новага Папы.

Святы Айцец Бэнэдыкт XVI разважае над тым, каб у бліжэйшыя дні апублікаваць дакумент, які ўнясе дапаўненні ў Апостальскую канстытуцыю аб канклавах. Аб гэтым паведаміў кіраўнік Прэс-службы Апостальскай Сталіцы кс. Фэдэрыка Ламбардзі падчас сустрэчы з журналістамі 20 лютага.

У першай палове сакавіка каталіцкі свет чакае важная падзея — абранне новага Папы. Паводле прадугледжаных правілаў, канклаў павінен пачацца не раней за 15 і не пазней за 20 дзён з моманту абвяшчэння Пасаду св. Пятра вакантным. Аднак, у сувязі з тым, што Бэнэдыкт XVI загадзя паведаміў аб сваім рашэнні, гэты канклаў зможа пачацца раней. Яго ўдзельнікі маюць магчымасць загадзя прыбыць у Рым і таму, паводле кіраўніка Прэс-службы Апостальскай Сталіцы кс. Фэдэрыка Ламбардзі, «няма сэнсу чакаць» заканчэння прадугледжанага тэрміну.

Старшыня Прэс-службы Апостальскай Сталіцы кс. Фэдэрыка Ламбардзі падкрэсліў, што Папа «ясна казаў аб магчымасці» скласці з сябе паўнамоцтвы Наступніка святога Пятра ў кнізе-інтэрв’ю «Святло свету», а таксама меў звычку асцярожна і разважліва казаць аб будучых падзеях свайго Пантыфікату, даваў зразумець, што выконвае даручаную яму місію, а не карыстаецца атрыманай уладай.

Канклаў — сход кардыналаў, які склікаецца для абрання новага Папы — распачнецца не раней 15 сакавіка і не пазней 20. Аб гэтым паведаміў прэс-сакратар Апостальскай Сталіцы кс. Фэдэрыка Ламбардзі.

Пасля заканчэння прабывання на Пасадзе св. Пятра, 28 лютага, Святы Айцец накіруецца спачатку ў летнюю рэзідэнцыю ў Кастэль Гандольфа, а праз некаторы час вернецца ў Ватыкан і паселіцца ў кляштары «Mater Ecclesia». Пра гэта паведаміў 14 лютага старшыня Прэс-службы Апостальскай Сталіцы кс. Фэдэрыка Ламбардзі.

«Дзякуем за прыклад простага і пакорнага працаўніка ў вінаградніку Пана, працаўніка, які ўмеў кожную хвіліну рабіць тое, што найважнейшае: несці Бога людзям і весці людзей да Бога», — такімі словамі падзякаваў Святому Айцу Бэнэдыкту XVI Дзяржаўны сакратар Яго Святасці кардынал Тарчызіо Бэртонэ падчас святой Імшы ў Папяльцовую сераду, 13 лютага.

У бліжэйшыя дні ў раскладзе Святога Айца Бэнэдыкта XVI не адбудзецца сур’ёзных зменаў. У апошні дзень свайго Пантыфікату Папа сустрэнецца з членамі Калегіі кардыналаў. Аб гэтым паінфармаваў старшыня Прэс-службы Апостальскай Сталіцы кс. Фэдэрыка Ламбардзі.

На пачатку агульнай аўдыенцыі 13 лютага Святы Айцец Бэнэдыкт XVI нагадаў вернікам аб сваім рашэнні скласці з сябе паўнамоцтвы Наступніка святога Пятра. Пантыфік папрасіў аб малітве за сябе, за будучага Папу і за Касцёл.

12 лютага падчас сустрэчы з журналістамі старшыня Прэс-службы Апостальскай Сталіцы кс. Фэдэрыка Ламбардзі паінфармаваў, што энцыкліка на тэму веры, якая магла б стаць чацвёртай энцыклікай папы Бэнэдыкта XVI, не будзе апублікавана, бо гэтага не дазваляе рэдакцыйны стан яе тэксту на сённяшнім этапе.

Бэнэдыкт XVI скончыць выконваць абавязкі Рымскага Пантыфіка 28 лютага ў 20.00 — час, калі Святы Айцец звычайна заканчвае свой працоўны дзень, перш чым адправіцца на вячэрнюю малітву і адпачынак. Пра гэта паведаміў падчас сустрэчы з журналістамі кс. Фэдэрыка Ламбардзі, старшыня Прэс-службы Апостальскай Сталіцы, дадаўшы, што апошні працоўны дзень Папы пройдзе звычайным чынам.

11 лютага Бэнэдыкт XVI абвясціў нечаканае рашэнне — ён вырашыў пакінуць Пасад св. Пятра. Пантыфік паведаміў аб гэтым падчас звычайнай кансісторыі — сустрэчы з кардыналамі, прысвечанай разгляду некаторых кананізацыйных спраў. Як вядома, на працягу 600 гадоў нічога падобнага ў гісторыі Касцёла не здаралася.

Кардынал Ёзаф Ратцынгер — папа Бэнэдыкт XVI — быў абраны на Пасад св. Пятра 19 красавіка 2005 года. Прапануем асноўныя падзеі і лічбы, якімі суправаджаўся яго Пантыфікат.

Працэдура абрання Папы канчаткова склалася толькі ў другой палове XIII ст. На працягу першых трох стагоддзяў Пантыфіка абірала духавенства і вернікі. Пазней гэтае права пакідалася за манархамі. Апошнія змены ў правілы выбару Пантыфіка ўнёс Папа Бэнэдыкт XVI.

Апостальская Нунцыятура ў Рэспубліцы Беларусь паведамляе, што сёння падчас звычайнай кансісторыі Яго Святасць Папа Бэнэдыкт ХVI аб'явіў аб сваім рашэнні скласці з сябе паўнамоцтвы Наступніка св. Пятра. Гэтае рашэнне ўступае ў сілу 28 лютага 2013 года ў 20.00 рымскага часу.

Пасля 28 лютага Пантыфік будзе жыць у Кастэль Гандольфа на час sede vacante, а пасля накіруецца ў кляўзуровы кляштар на тэрыторыі Ватыкана. Пра гэта паведаміў Прэс-сакратар Апостальскай Сталіцы кс. Федэрыка Ламбардзі.