|
 4 ліпеня ў Мінску адбылася сустрэча Прэзідэнта Беларусі Аляксандра
Лукашэнкі са старшынёй Папскай рады па міжрэлігійным дыялогу кардыналам
Жанам-Луі Таранам. Святы Айцец Францішак прызначыў кардынала сваім
легатам на юбілейныя ўрачыстасці ў Будславе.
Прэзідэнт выказаў задавальненне, што вядучыя канфесіі ў Беларусі, праваслаўная і каталіцкая, «знайшлі шляхі, па якіх развіваюць супрацоўніцтва», і ахарактарызаваў іх узаемаадносіны як «канструктыўныя і карысныя для дзяржавы». «У Беларусі існуе 25 канфесій. Мы змаглі забяспечыць міжканфесійны мір і
стабільнасць», — адзначыў падчас сустрэчы Аляксандр Лукашэнка, словы
якога прыводзіць «Интерфакс-Запад».
«У апошні час мы шмат зрабілі для нашых дзвюх Цэркваў», — сказаў кіраўнік дзяржавы і нагадаў, што прынята рашэнне аб будаўніцтве ў Беларусі каталіцкага духоўна-адукацыйнага цэнтра.
«Важна, каб каталіцкія святары былі грамадзянамі Беларусі», — адзначыў Прэзідэнт.
«Я вельмі спадзяюся, што Ваша прабыванне ў Беларусі будзе паспяховым», — сказаў Аляксандр Лукашэнка, звяртаючыся да кардынала. Па словах Прэзідэнта, пытанняў, якія б «выклікалі дадатковыя праблемы, у нас сёння няма».
«Я хацеў бы запэўніць Вас і папрасіў бы перадаць Папу Рымскаму, што каталіцкая канфесія, як і раней, будзе займаць годнае месца ў Беларусі», — падкрэсліў кіраўнік дзяржавы і дадаў, што грамадзяне краіны будуць мець усе магчымасці для рэалізацыі сваіх рэлігійных перакананняў.
Кардынал Жан-Луі Таран падчас сустрэчы адзначыў, што дадзены візіт з’яўляецца яго першай паездкай у Беларусь. «Мне цікава на месцы азнаёміцца з рэаліямі, паглядзець, як адбываецца дыялог канфесій», — дадаў легат.
«У мяне была магчымасць размаўляць з прадстаўнікамі розных дзяржаў, і падчас дыялогу ты разумееш, як важна, калі існуе добры кантакт паміж прадстаўнікамі канфесій і прадстаўнікамі дзяржавы, — сказаў старшыня Папскай рады. — Таму мне прыемна чуць Вашы словы, што ўсе канфесіі знайшлі ў Беларусі дом, каб яны маглі размаўляць, супрацоўнічаць адзін з адным і жыць у згодзе».
Папскі легат перадаў Прэзідэнту найлепшыя пажаданні ад Святога Айца Францішка і благаслаўленне ўсяму беларускаму народу. (AG) Фота БЕЛТА
|
для друку
