Экспазіцыю пра кс. Юзафа Бульку плануецца стварыць у музеі Мосара

Беларусь

08.05.2014 11:32

Экспазіцыю, прысвечаную ксяндзу Ёзасу Бульку, плануюць стварыць у музеі вёскі Мосар (Глыбоцкі раён) да 500-годдзя населенага пункта. Паведамляе БЕЛТА. «Дзякуючы асабістай ініцыятыве ксяндза ў Мосары быў створаны філіял нашага музея. Тут сабраныя старыя рэчы, якімі некалі карысталіся мясцовыя жыхары (усе экспанаты з Мосара і яго ваколіц). Да юбілейнай даты музей плануецца дапоўніць інфармацыяй аб Юзафе Бульку, які ўдыхнуў новае жыццё ў населены пункт і разам з мясцовымі жыхарамі стварыў тут культурна-дэндралагічны комплекс, які штогод наведвае вялікая колькасць беларускіх і замежных турыстаў», — распавяла дырэктар музея. Юбілейныя ўрачыстасці пройдуць у Мосары ў жніўні. Да гэтага часу тут запланавана правесці комплекс мерапрыемстваў па рамонце, рэканструкцыі і добраўпарадкаванні: будзе створана сістэма паліву, устаноўлены каруселі, арэлі і горкі для дзяцей, ачышчаны штучныя вадаёмы, адрамантаваны тратуарныя дарожкі і пракладзены новыя, адрамантаваны дах у адміністрацыйным будынку і будынку музея, праведзена афарбоўка скульптурных кампазіцый, рэстаўрацыя капліц, абнаўленне абразоў, рамонт і замена альтанак, рамонт калодзежаў крыніц і маста праз штучны вадаём, праведзена азеляненне з высадкай вялікай колькасці дрэў і кустоў, разбіўкай новых кветнікаў. Упершыню ў дакументах Мосар згадваецца пад 1514 годам. За час свайго існавання вёска змяніла шмат гаспадароў: Зяновічы, Пацы, Долмат-Ісакоўскія, Млечкі і нават стрыечны брат кіраўніка Польскай дзяржавы Юзафа Пілсудскага Калікст. Але найбольшы след у гісторыі вёскі пакінуў графскі род Бжастоўскіх, у прыватнасці Ганна і Роберт Бжастоўскія. Менавіта яны ў канцы ХVIII стагоддзя пабудавалі тут палац і касцёл. Палац, у якім гасцявалі нават каралі Рэчы Паспалітай, быў знішчаны падчас грамадзянскай вайны. Касцёл св. Ганны захаваўся да нашых дзён. Стварэнне культурна-дэндралагічнага комплексу пачалося ў 1989 годзе з прыездам у Мосар ксяндза Юзафа Булькі. Тут высаджана вялізная колькасць кветак (ёсць нават лотасы), дрэў і кустоў розных відаў, створаны скульптурныя кампазіцыі рэлігійнай скіраванасці, штучны вадаём, усталяваны самы высокі ў Беларусі каталіцкі крыж, створаны антыалкагольны музей і алея цвярозасці. За сваю дзейнасць Юзаф Булька атрымаў прэмію «За духоўнае адраджэнне», узнагароджаны медалём Францішка Скарыны, граматай «За асабісты ўклад у развіццё турызму ў Рэспубліцы Беларусь», атрымаў апостальскае благаслаўленне ад Папы Рымскага. Памёр святар у 2010 годзе. Паводле belta.by, (AYU)