У Глыбокім завяршыўся трэці дзень конкурснай праграмы 10-га Міжнароднага кінафестываля «Магніфікат». Сваім уражаннем ад працы на кінафестывалі з Catholic.by падзяліўся адзін з членаў журы, дырэктар Вяцкага епархіяльнага кінаклуба «Сустрэча» протаіерэй Аляксандр Каратаеў.

– Самым моцным уражаннем на гэтым фестывалі для мяне стаў цуд адзінства, які я перажыў як асабісты духоўны досвед. Гэта маё асабістае адкрыццё. Яшчэ апостал Павел пакінуў нам у спадчыну наказ пра адзінства – быць адзінымі ў разнастайнасці. 

Я ўпершыню ў Беларусі і ўпершыню на фестывалі ў якасці члена журы. Фестываль «Магніфікат» напоўнены для мяне штодзённымі адкрыццямі. Напрыклад, тут я пабачыў у тым ліку і стужкі, якія прысвечаны нацыянальным традыцыям і народным абрадам. Да хрысціянскай тэматыкі яны маюць ускоснае дачыненне, але якія яны цікавыя! Асабіста для мяне яны бясконца дарагія праз сваю напоўненасць непаўторным духам народнага жыцця ў розныя гістарычныя часы ў розных геаграфічных раёнах. Конкурсная праграма юбілейнага фестываля сапраўды вельмі разнастайная.

Я вельмі люблю фільмы, дзе ёсць спроба спалучыць неспалучальнае.  У гэтым сэнсе «Магніфікат» мяне вельмі радуе. Бо, на мой погляд, самымі цікавымі з’яўляюцца якраз такія фільмы, а не стужкі максімальна ідэалагічныя або дасканалыя тэхнічна.

Іна Сабалеўская, спецыяльна для Catholic.by