| Тэалагічны каледж у Мінску распачаў новы навучальны год |
| Беларусь |
| 06.09.2014 17:34 |
 Новы навучальны год у «Мінскім тэалагічным каледжы імя св. Яна Хрысціцеля» адкрыўся 6 верасня 2014 г. у касцёле св. Сымона і св. Алены святой Імшой для выкладчыкаў і навучэнцаў. Эўхарыстыю ўзначаліў дапаможны біскуп Мінска-Магілёўскай архідыяцэзіі Юрый Касабуцкі.«Ты верыш, але ці любіш?» У гаміліі да студэнтаў біскуп адзначыў значэнне вучобы і пазнання Божых праўдаў у справе ўмацавання веры кожнага навучэнца. Таксама іерарх вельмі яскрава падкрэсліў, гледзячы ў перспектыву вучобы, што яе завяршэннем павінна стаць любоў, адкрыццё любові да Бога і ўзрастанне ў ёй. «Ты верыш, але ці любіш?» — пытанне, якое было звернута біскупам да кожнага прысутнага. «Калі не будзе любові, то самыя вялікія веды, якія б мы ні здабылі, застануцца ляжаць на паліцы, схаваныя ад іншых, — адзначыў іерарх і заклікаў сведчыць пра Бога з любоўю: — Ідзі і будзь вучнем, вучаніцай, і тое, што мог спазнаць, перадавай сваім блізкім, родным».
 Тыя, каму даручана дапамагаць пазнаваць — выкладчыкі Напрыканцы Імшы былі агучаны імёны трох новых выкладчыкаў каледжа, якім біскуп удзяліў благаслаўленне. Да ліку 22 выкладчыкаў каледжа далучыліся кс. Дзмітрый Пухальскі, Ларыса Абрамчук і Марына Казмірук. Ксёндз Дзмітрый Пухальскі будзе выкладаць кананічнае права, а таксама метадалогію. Акрамя гэтага, на святара ўскладаюцца абавязкі кіраўніцтва навучальным працэсам, кантроль па напісанні дыпломных прац і пацвярджэнне пераходу студэнтаў на наступны год навучання. Ларыса Абрамчук, журналістка, артыкулы якой рэгулярна можна чытаць на старонцы беларускай рэдакцыі Ватыканскага радыё, дапаможа разабрацца з асаблівасцямі сродкаў масавай камунікацыі, а выкладчыца, выпускніца Інстытута тэалогіі імя свв. Кірылы і Мятода ў Мінску Марына Казмірук будзе чытаць курс лекцый па новых рэлігійных рухах. Раней гэты курс чытаў сённяшні біскуп Юрый Касабуцкі. Марына Казмірук адзначыла: «Мэта майго курсу - каб студэнты маглі арыентавацца ў новых рухах не па іх назвах, але маглі на практыцы па знешніх прыкметах адрозніваць традыцыйныя рэлігіі ад нетрадыцыйных, ад секты».
Ян Вярэнька падзяліўся, што ён ужо не першы год выкладае катэхезу для дзяцей, якія рыхтуюцца да Першай Камуніі. 15 чалавек, якіх ён вучыў, прыступілі да сакрамэнту пакаяння і паяднання. Сам ён прыняў Камунію ў 15 гадоў, потым на працягу трох гадоў быў міністрантам, 6 гадоў - сакрыстыянінам. Зараз ён жыве ў Докшыцах, але дапамагае кс. Юрыю Бараўнёву ў Крулеўшчызне, Барсуках і Порплішчах. Сістэма ацэнкі ў каледжы не 10-бальная, а 5-бальная, без плюсаў і мінусаў. Для паспяховай здачы іспытаў патрабуецца прысутнасць на лекцыях і занятках, якія пачынаюцца ў 8.30, а заканчваюцца ў 17.45 і праходзяць на пляцоўках Чырвонага касцёла, сярод якіх парафіяльны дом і бібліятэка імя Адама Міцкевіча.  На ўрачыстым адкрыцці прысутнічаў а. Алег Шэнда OFMCap, які прачытаў першую лекцыю для студэнтаў на тэму «Друя — месца аднаўлення кансэкраванага жыцця ў Беларусі», у якой распавёў пра святароў, якія ў першай палове ХХ стагоддзя з’яўляліся сапраўднымі адраджэнцамі беларушчыны ў Касцёле. За свае погляды ім прыйшлося цярпець ціск з боку як польскага ўраду, так і камуністаў, часамі не проста зняволенне, але і смерць. Айцец Алег Шэнда прыгадаў шматлікія імёны айцоў марыянаў і іх лёсы, якія на сённяшні дзень для многіх беларусаў з’яўляюцца прыкладам змагання за сваю нацыянальную ідэнтычнасць і годнасць, сваю мову і веру. Аксана Ючкавіч |
| Фотарэпартаж |
для друку
