7-8 сакавіка адбыліся велікапосныя рэкалекцыі для шэфаў скаўцкага руху.

Асаблівым пунктам рэкалекцый стаў майстр-клас па жывапісе, які правяла шэф агульнабеларускага вогнішча і мастачка Іна Пяткевіч. Дзяўчаты праявілі свой творчы патэнцыял і адкрылі ў сабе новыя таленты. Затым шэфы, што прыехалі з Гродна, Віцебска, Мінска, Пастаў, Гомеля, мелі магчымасць паўдзельнічаць у святой Імшы, пасля якой адбылося выстаўленне Найсвяцейшага Сакрамэнту і малітва аздараўлення. Аднім з апошніх пунктаў праграмы суботняга вечара была сустрэча з цікавым чалавекам — сястрой служабнічкай Антоніяй, якая падзялілася вопытам свайго манаскага жыцця. У ёй скаўткі адкрылі сапраўдны вобраз шчаслівай, поўнай радасці і Божага супакою жанчыны.

Сустрэчы з кансэкраванымі асобамі, дзяленне ў групах, супольная праца і творчасць і час, які скаўцкія шэфы правялі разам у Лынтупах, стаў для кожнай дзяўчыны часам пошуку адзінага жыццёвага шляху і наблізіў кожную да свайго асабістага «Fiat», як адказу на заклік да ўсеабдымнай любові і адданага служэння Богу.