14 мая ў архікатэдральным касцёле Імя Найсвяцейшай Панны Марыі ў Мінску выступяць восем харавых калектываў. Выступленне адбудзецца ў межах Х Міжнароднага форуму студэнцкіх хораў «Папараць-кветка-2015», які арганізуе Беларускі дзяржаўны ўніверсітэт. Удзел у конкурсе прымаюць харавыя калектывы з Беларусі, Расіі і Літвы.

У першы дзень адбудзецца конкурс «Духоўная музыка». Пад скляпеннямі адной з найпрыгажэйшых святыняў Беларусі гледачы пачуюць хрысціянскія спевы ў выкананні звыш 250 удзельнікаў. Тут прагучаць вядомыя творы кампазітараў-класікаў Паўла Часнакова, Міхаіла Іпалітава-Іванова, Анатоля Кісялёва, Вольфганга Амадэя Моцарта і інш.

Другі конкурсны дзень адкрыецца праграмай з твораў свецкай музыкі. У сталічнай канцэртнай зале «Верхні горад» 15 мая прагучаць вядомыя мелодыі сучасных кампазітараў. Тут будуць выкананы песні Ігара Лучанка, Уладзіміра Кандрусевіча, Аляксандра Новікава, Фрэдзі Мэрк'юры і інш.

Па традыцыі для ўдзельнікаў будуць арганізаваны адукацыйныя мерапрыемствы, якія ўключаюць майстар-класы па вакальна-харавым мастацтве і творчыя сустрэчы з вядомымі кампазітарамі.

Гала-канцэрт адбудзецца ўвечары 16 мая пад адкрытым небам на плошчы Свабоды каля будынка гарадской ратушы.

Усе ўдзельнікі X Міжнароднага форуму студэнцкіх хораў «Папараць-кветка-2015» атрымаюць сертыфікаты і дыпломы, якія прысуджаюцца спецыяльным экспертным саветам. У гэтым годзе ў яго склад увайшлі дырыжоры харавых калектываў Гедымін Раманаўскас (Шаўляй, Літва), Майкл Доўсан (Дублін, Ірландыя), Сямён Кліманаў (Беларусь) і Павел Шэпелеў (Беларусь).

На ўсе мерапрыемствы ўваход вольны.

(AYU)