З 6 па 16 чэрвеня група дзяцей з дарослымі праводзіла вандроўку «Па шляхах св. Яна Паўла ІІ» ў Польшчы. Група, якая складалася з 40 чалавек, распачала вандроўку ад Варшавы.

Праз тры дзеці і дарослыя адпачывалі ў Шчырку каля санктуарыя Маці Божай на горцы. Падняўшыся на шчыт гары Скшычнэ, вандроўнікі назіралі прыгажосць пейзажу і мелі магчымасць адчуваць сябе як у небе, дзе адчувалася блізкасць Божай прысутнасці. Наступным месцам вандроўкі стаў Кракаў, дзе падарожнікі наведалі недаўна пабудаваны санктуарый Яна Паўла ІІ, маліліся каля рэліквій св. Фаўстыны Кавальскай, захапляліся каралеўскім замкам. Абавязковым месцам вандроўкі былі Вадавіцы – месца, дзе нарадзіўся Ян Павел ІІ. Пасля вандроўнікі наведалі таксама санктуарый у Чэнстахове, санктуарый Маці Божай Балеснай у Свентай Водзе і мелі магчымасць памаліцца ў касцёле ў Сакулцы, дзе знаходзіцца кропля Крыві Пана Езуса з эўхарыстычнага цуду, які адбыўся там ў 2008 годзе.

Маршрут вандроўкі, які падрыхтавалі кс. Станіслаў і с. Вераніка, вельмі спадабаўся ўсім удзельнікам пілігрымкі. Назіраючы прыгажосць розных месцаў Польшчы, падарожнікі мелі магчымасць затрымацца ў цішыні і скіраваць малітву Богу з падзякай за тое, што Ён стварыў для людзей і праз розныя цуды адкрывае для іх сваю міласэрную любоў.

Паводле www.sdb.by

(AG)

Фота www.sdb.by