Яшчэ адзін беларус, Алег Зубарэвіч з грэка-каталіцкай парафіі Маці Божай Нястомнай Дапамогі ў Мінску, распачаў у манастыры ва Украіне духоўную падрыхтоўку для ўступу ў Кангрэгацыю Найсвяцейшага Адкупіцеля.

19 жніўня ў манастыры св. Герарда ў старадаўнім марыйным цэнтры Кахавіна, што ў м. Гніздычаў Львоўскай вобласці, грэка-католік з Беларусі Алег Зубарэвіч разам з яшчэ трыма братамі з Украіны прыняў аблачыны (урачыста атрымаў манаскую вопратку) і распачаў год навіцыяту ў Львоўскай правінцыі рэдэмптарыстаў. Адначасова з імі двое братоў завяршылі навіцыят і склалі першыя манаскія абяцанні.

Брат Алег Зубарэвіч падчас урачыстых аблачынаў.

Гэтыя ўрачыстасці на свята Перамянення Гасподняга паводле юліянскага календара ўзначаліў протаігумен Львоўскай правінцыі рэдэмптарыстаў а. Андрэй Рак, разам з якім саслужыў беларускі рэдэмптарыст а. Зміцер Чарнель.

Навіцыят з'яўляецца кананічным часам падрыхтоўкі юнакоў, падчас якога адбываецца знаёмства з духоўнасцю і місіяй манаскай супольнасці. Брат Алег стаў ужо чацвёртым рэдэмптарыстам візантыйскага абраду з Беларусі, двое з іх — святары.

Фота: Валадзімір Барэйка CSsR. Беларуская грэка-каталіцкая газета «Царква».

(АлГ)