У чэрвені 2016 года ў Гродне плануюць завяршыць будаўніцтва Дома міласэрнасці, які размесціцца ў былым кляштары брыгітак XVII ст.

Гродзенскі партал «Твой стыль» зазірнуў у кляштар, у якім зараз вядзецца рэканструкцыя.

Былы кляштар брыгітак займае сёння адзін з кварталаў старога Гродна. Комплекс быў пабудаваны ў 1635 годзе, калі вялікі маршалак літоўскі Кшыштаф Весялоўскі і яго жонка Аляксандра заснавалі кляштар у памяць прыёмнай дачкі Грызельды, якая рана пайшла з жыцця.

У 1642 годзе на месцы драўлянага быў узведзены і мураваны касцёл у стылі барока.

Сёстры брыгiткi жылі ў кляштары з сярэдзіны XVII стагоддзя да 1908 года, калі адышла ў вечнасць апошняя манахіня гэтай супольнасці. Пасля кляштар перайшоў да сясцёр назарэтанак.

У 1950 годзе дзейнасць комплекса была спынена. У касцёле планавалася стварыць канцэртную залу, у іншых будынках размясціць дзіцячы сад, а пазней псіхіятрычную бальніцу.

У выніку тут быў размешчаны псіханеўралагічны дыспансер. Толькі ў 1990-х гг. касцёл зноў вярнулі вернікам.

У лямусе, які знаходзіцца на тэрыторыі комплексу, у будучыні можа размясціцца экспазіцыя, прысвечаная гісторыі Гродзенскай дыяцэзіi. Чакаецца, што ў музеі можна будзе ўбачыць старадаўнія кнігі XVII-XIX стагоддзяў, алтарныя абразы, дакументы, фатаграфіі і многае іншае.

Лямус можна назваць унікальнай для Гродна гістарычнай пабудовай. Будынак зроблены ў традыцыях беларускага народнага дойлідства — выкладзены з масіўных брусоў без выкарыстання клямараў і металічных крапяжоў.

У 1964 годзе ў крыпце касцёла была знойдзена вялікая колькасць абразоў і партрэтаў (у тым ліку заснавальнікаў кляштара), якія пасля рэстаўрацыі ў Эрмітажы далучыліся да экспазіцыі Нацыянальнага мастацкага музея ў Мінску.

Паводле Руслана Кулевіча, «Твой стыль», (IL)