30 верасня ў законным доме салезіян у Мінску адбылося чарговае пленарнае пасяджэнне Вышэйшых настаяцеляў, дэлегатаў і прадстаўнікоў мужчынскіх і жаночых манаскіх Інстытутаў і Таварыстваў апостальскага жыцця ў Беларусі, падчас якога адбылася прэзентацыя энцыклікі Святога Айца «Laudato Sі’».

Святую Імшу ўзначаліў Cтаршыня Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Тадэвуш Кандрусевіч. У гаміліі іерарх падкрэсліў, якую вялікую ролю манаскія супольнасці адыгралі пры адраджэнні Каталіцкага Касцёла пасля камуністычнага рэжыму, калі нашая краіна перажывала вялікі недахоп святароў.

Арцыбіскуп выказаў падзяку ўсім кансэкраваным асобам за іх адданую і ахвярную працу ў Касцёле ў Беларусі. «Без вас нельга было б уявіць сабе яго адраджэння, станаўлення і развіцця. Тое ж самае трэба сказаць і пра Паўсюдны Касцёл», — сказаў Мітрапаліт. Іерарх нагадаў, што ў свеце лічба кансэкраваных асобаў дасягае мільёна, і гэта вялікі патэнцыял у аднаўленні Касцёла.

«Сучасны свет забываецца, што заўсёды жывы Хрыстус ёсць галоўным у Касцёле. Усё часцей свет глядзіць на Касцёл як на нейкую арганізацыю, падобную да свецкай, якая займаецца развіццём і прапагандай культуры і дабрачыннасці. Але, калі ў Касцёле на першым месцы не будзе Хрыста, не будзе вертыкальнага складніка, а застанецца толькі гарызантальны, то ён страціць сэнс свайго быцця ў свеце. Ён не будзе сакрамэнтам паўсюднага збаўлення, а стане музеем», — адзначыў Мітрапаліт. Таму, па словах арцыпастыра, вельмі актуальным з’яўляецца заклік Папы Францішка да кансэкраваных асобаў разбудзіць Касцёл.

Арцыбіскуп звярнуў увагу, што кансэкраваным асобам «неабходна вярнуцца да крыніц», з якіх вырастае іх пакліканне, а менавіта «да абяцанняў чыстасці, убоства і паслухмянасці, а таксама да харызмы заснавальнікаў». Мітрапаліт падкрэсліў, што перад усім Касцёлам у Беларусі і перад кансэкраванымі асобамі ў прыватнасці «стаіць вельмі адказнае заданне: так евангелізаваць, каб збаўляць свет».

Пасля святой Імшы ў зале сустрэчы пасля ўступнай малітвы старшыня аб’яднання а. Міхаіл Цвячкоўскі МІС агучыў ліст да Папы Францішка з нагоды другога пленарнага пасяджэння аб’яднання. У лісце між іншым былі выказаны словы еднасці з Апостальскім Пасадам, а таксама надзея на візіт Папы ў нашу краіну.
Падчас пасяджэння аб’яднання арцыбіскуп Тадэвуш Кандрусевіч скіраваў практычныя ўвагі і прапановы да кіраўнікоў манаскіх супольнасцяў Беларусі, а таксама прадставіў беларускае выданне энцыклікі Святога Айца Францішка «Laudato Sі’».

Пасля абедзеннага перапынку адбыліся выбары новага старшыні, намесніка старшыні, а таксама радных аб’яднання Вышэйшых настаяцеляў, дэлегатаў і прадстаўнікоў мужчынскіх і жаночых манаскіх Інстытутаў і Таварыстваў апостальскага жыцця ў Беларусі.

У першым галасаванні прысутныя адзінагалосна, за выключэннем аднаго голасу, абралі старшынёй аб’яднання а. Міхаілa Цвячкоўскага МІС. Амаль з такім жа вынікам былі абраны намеснік старшыні аб’яднання, якім стала с. Паўла Бобар MFS, і сакратар, якім стаў а. Станіслаў Вашкевіч SAC. Раднымі аб’яднання абралі а. Алега Шэнду OFMCap, а. Вітольда Пяцельчыца SChP і с. Малгажату Аўгустын ASC.

Сустрэча Вышэйшых настаяцеляў, дэлегатаў і прадстаўнікоў мужчынскіх і жаночых манаскіх Інстытутаў і Таварыстваў апостальскага жыцця ў Беларусі завяршылася супольнай малітвай, якую ўзначаліў старшыня аб’яднання а. Міхаіл Цвячкоўскi МІС.

(AG)