5-8 кастрычніка сёстры Людміла Леўдаровіч i Яніна Жукоўская з супольнасці сясцёр Місіянерак Хрыста Валадара прынялі ўдзел у Пілігрымцы кансэкраваных асобаў у Рыме.

Ініцыятарам пілігрымкі, у якой удзельнічалі таксама законнікі і законніцы з Аргенціны, Бельгіі, Даніі, Францыі, Грэцыі, Германіі, Украіны, Венгрыі, Італіі, Вялікабрытаніі і ЗША,  стаў біскуп Веслаў Ляховіч, дэлегат Канферэнцыі Каталіцкіх Біскупаў у Польшчы па справах душпастырства эміграцыі. У Год кансэкраванага жыцця, які перажывае зараз Касцёл, удзельнікі сустрэчы дзякавалі за дар паклікання да служэння ў Хрыстовым Касцёле.

Праграма мерапрыемства ўключала сімпозіум, канферэнцыі, дзяленне досведам свайго штодзённага служэння ў розных краінах.

7 кастрычніка ўдзельнікі пілігрымкі прысутнічалі на агульнай аўдыенцыі на плошчы св. Пятра, а потым сустрэліся з Папам Францішкам. Падчас сустрэчы Святы Айцец папрасіў асабліва маліцца аб новых пакліканнях, у якіх сёння мае патрэбу Касцёл. Таксама Папа заклікаў да асаблівага служэння сярод хворых і пажылых людзей.

8 кастрычніка кансэкраваныя асобы ўдзельнічалі ў ранішняй святой Імшы пры гробе св. Яна Паўла ІІ.

Мэтай пілігрымкі была таксама інтэграцыя кансэкраваных асобаў, лепшае знаёмства адзін з адным, абмен досведам і найперш малітва, каб іх штодзённае служэнне ў свеце прыносіла ўсё большыя плёны.

Кс. Юрый Марціновіч