17-18 кастрычніка ў Гродне адбылася педагагічная сустрэча шэфаў скаўцкага руху, прысвечаная працы з хрысціянскай моладдзю. Рэно Лануа, камісар, які адказвае за развіццё скаўцкіх адзінак ва Усходняй Еўропе, правёў у парафіі Найсвяцейшага Адкупіцеля цырымонію прызначэння новых генеральных камісараў.

Беларускія скаўты аказалі давер Юліі Чарніцкай і Паўлу Бельскаму, якія будуць займаць пасаду генеральных камісараў руху на працягу наступных трох гадоў.

Сустрэча праходзіла вельмі насычана. На ўрачыстым шыхтаванні Рэно Лануа прыняў абяцанне ад новых генеральных камісараў годна выканаць місію, даручаную ім Богам і ўдзельнікамі скаўцкага руху.

На наступным этапе сустрэчы групы хлопцаў і дзяўчат абмяняліся ведамі і вопытам працы ў сваіх галінах, не забыліся таксама пра духоўнае развіццё падчас гадзіны вандроўніка (у хлопцаў) ці гадзіны святла (у дзяўчат), якія паспрыялі развіццю больш глыбокіх адносін з Богам. Сабраныя разважалі сам-насам у цішыні аб жыцці.

Па традыцыі скаўцкі дзень завяршыўся вогнішчам – педагагічным момантам, калі ўсе свае веды, думкі, таленты скаўты не саромеюцца паказаць іншым. Гэта адбываецца ў форме сцэнкі, спеву, танцу або гульні. На гэтым вогнішчы сабраныя нават пачулі оперу ў выкананні хлопцаў вандроўнікаў. Вогнішча было прысвечана тэме “Незвычайны госць”, таму на сцэне можна было пабачыць не толькі мініяцюры пра бельгійца Рэно, але і іншаземных стварэнняў, і французаў, і оперных спевакоў.

Позна вечарам скаўты развіталіся з бельгійскім госцем Рэно.

На наступны дзень шэфы правялі ў групах падагульняючыя заняткі. Усе прысутныя прынялі ўдзел у святой Імшы ў парафіі Найсвяцейшага Адкупіцеля.

Уладзіслаў Драздоўскі, Дружыновы 1 Барысаўскай дружыны, (AG)