9 лістапада ў Бараўлянах прайшоў чарговы квартальны дзень духоўнага аднаўлення для салезіян. У сустрэчы ўдзельнічалі 16 салезіян з усёй Беларусі. Час духоўнага засяроджання раздзяліў з сабратамі дапаможны біскуп Мінска-Магілёўскай архідыяцэзіі Аляксандр Яшэўскі SDB.

Сустрэча, якая між іншым была прысвечана супольнай малітве за памерлых сабратоў, пачалася адарацыяй Найсвяцейшага Сакрамэнту і малітвай святога Ружанца за памерлых салезіян, якія працавалі на тэрыторыі Беларусі і былой усходняй салезіянскай акругі. Паводле салезіянскай традыцыі адарацыя скончылася малітвамі аб ласцы добрай смерці.

Найважнейшым момантам сустрэчы была цэлебрацыя Эўхарыстыі, пасля якой біскуп Аляксандр Яшэўскі прамовіў да сабратоў канферэнцыю на тэму законнай еднасці. Асновай для разважанняў стаў Дэкрэт Другога Ватыканскага Сабору Presbyterorum Ordinis (Пра служэнне і жыццё прэзбітэраў). Біскуп засяродзіў свае разважанні асаблівым чынам на 8-м параграфе гэтага дэкрэту, падкрэсліўшы важнасць у першую чаргу духоўнага аспекту святарскай еднасці, а таксама чалавечага аспекту, які можа праяўляцца ў розных формах.

Біскуп пажадаў, каб салезіянская супольнасць у Беларусі не згубіла сваёй мэты, а каб у адзінстве з лакальным Касцёлам працавала для збаўлення чалавечых душаў, асабліва маладых людзей. Таксама іерарх пажадаў, каб кожны з сабратоў заўсёды знаходзіў момант для кантэмпляцыі, якая будзе праяўляцца ў рэгулярнай супольнай малітве, братэрскай сустрэчы і супольным адпачынку.

Дні духоўнага аднаўлення для салезіян у Беларусі праходзяць адзін раз у квартал. Наступная такая сустрэча адбудзецца ў лютым 2016 года ў Дзятлаве.

Паводле www.sdb.by

(AG)

Фота www.sdb.by