25 лістапада ў «Карытас» Мінска-Магілёўскай архідыяцэзіі адбылося трэцяе пленарнае пасяджэнне Вышэйшых настаяцеляў, дэлегатаў і прадстаўнікоў мужчынскіх і жаночых манаскіх Інстытутаў і Таварыстваў апостальскага жыцця ў Беларусі.

Сустрэча пачалася святой Імшой, якую ўзначаліў дапаможны біскуп Мінска-Магілёўскай архідыяцэзіі Аляксандр Яшэўскі SDB, прызначаны на апошнім пасяджэнні епіскапату Беларусі адказным за кантакты з кансэкраванымі асобамі Беларусі.

У гаміліі біскуп адзначыў, як важна, каб кансэкраваныя асобы перажывалі стан манаскага жыцця ў глыбокай еднасці і адзінстве і былі прыкладам гэтай жа еднасці для іншых. Таксама іерарх звярнуў увагу, што адзінства немагчыма, калі ў адносінах паміж людзьмі адсутнічае шчырасць.

Пасля сумеснай святой Імшы і перапынку на каву ўдзельнікі сустрэчы пачалі працоўныя заняткі, на якіх былі закрануты разнастайныя пытанні, што датычылі перажывання Года кансэкраванага жыцця ў Беларусі.

Сустрэча завяршылася благаслаўленнем, якое ўдзяліў усім прысутным біскуп Аляксандр Яшэўскі SDB.

А. Міхаіл Цвячкоўскі МІС, (AG)