Каталіцкі Касцёл, Папа Францішак вельмі паважаюць беларускі народ. Пра гэта 4 снежня заявіў арцыбіскуп Клаўдыё Гуджэроцці з нагоды завяршэння дыпламатычнай місіі ў Беларусі на сустрэчы з кіраўніком беларускай дзяржавы Аляксандрам Лукашэнкам.

Арцыбіскуп шчыра падзякаваў Прэзідэнту Беларусі за добрыя словы ў свой адрас і за прадастаўленую магчымасць сустрэчы.

«Для мяне вялікі гонар сустракацца з Вамі, і гэта не першы раз. Мы гаварылі заўсёды вельмі шчыра. Мы адчуваем, што любім гэты народ. Любоў азначае, што ўсё можна гаварыць і сардэчна разумець адзін аднаго. Важна ўсё рабіць ад сэрца», — сказаў каталіцкі іерарх. Пры гэтым арцыбіскуп заўважыў: «Мне сумна, я гавару Вам гэта шчыра, таму што тут мне было добра жыць і працаваць».

Арцыбіскуп Клаўдыё Гуджэроцці падкрэсліў, што ён шмат ездзіў па Беларусі, яго шмат запрашалі, і не толькі ў вялікія гарады, але і ў маленькія населеныя пункты. Каталіцкі іерарх з цеплынёй успомніў аб сваім наведванні Віцебска і Гродна.

«Асабліва цікава было для мяне, калі я сустракаўся са звычайнымі людзьмі. Спадзяюся, што я змог даць хоць трошачкі цяпла і паказаць, што Каталіцкі Касцёл, Папа Рымскі вельмі паважае беларускі народ. І не толькі паважае, але і любіць гэты сціплы, вельмі добры беларускі народ», — дадаў іерарх.

Аляксандр Лукашэнка пажадаў арцыбіскупу Клаўдыё Гуджэроцці поспехаў і выказаў меркаванне, што арцыпастыр многае з беларускага вопыту зможа перанесці на новае месца сваёй дзейнасці.

Паводле БЕЛТА