13 снежня арцыбіскуп Клаўдыё Гуджэроцці, які завяршае служэнне Апостальскага Нунцыя ў Беларусі, наведаў сэрца Каталіцкага Касцёла ў нашай краіне — Нацыянальны санктуарый у Будславе. Малітвай перад абразом Маці Божай Будслаўскай іерарх распачаў сваё служэнне беларускаму народу і сваё чатырохгадовае служэнне завяршыў.

Будслаў — як альфа і амега служэння Беларусі

У першыя дні прыезду ў Беларусь, калі арцыбіскуп Клаўдыё Гуджэроцці трапіў у Будслаў, ён прывез у падарунак стулу з выявай святога Яна Паўла ІІ. Менавіта дзякуючы гэтаму Пантыфіку будслаўскаму касцёлу быў прызначаны статус базылікі, а ў 1998 годзе з благаслаўлення Папы-паляка кардынал Казімір Свёнтэк урачыста каранаваў цудадзейны абраз Маці Божай.

У дзень развітання са служэннем у Беларусі арцыбіскуп прыехаў да Маці Божай Будслаўскай з кветкамі. Пасля ціхай малітвы іерарх наблізіўся да абраза, каб паставіць кветкі бліжэй да Маці і ўшанаваць Яе ў цудадзейным абразе, перад якім схіляюцца беларусы з самымі рознымі просьбамі і пытаннямі, з рашэннямі і абяцаннямі, з вялікімі смуткамі і радасцямі, са шчырай і адданай малітвай за свой народ і яго будучыню.

Можна сказаць, што арцыбіскуп Клаўдыё Гуджэроцці нёс сваё служэнне ў Беларусі так, нібыта ў той дзень яго першай малітвы перад абразом Апякункі Беларусі Яна перадала арцыпастыру ўсё тое, чым спрадвеку жыў і жыве беларускі народ.

Аксана Ючкавіч