«Калі казаць аб тым, ці патрэбна нам малітва аб еднасці хрысціян, напэўна, у ХХІ стагоддзі вельмі актуальна гаварыць пра неабходнасць маліцца разам», — сказаў у каментарыі для Catholic.by з нагоды Тыдня малітваў аб еднасці хрысціян, які праходзіць з 18 па 25 студзеня, пастар Евангельска-лютэранскай Царквы Уладзімір Татарнікаў.

«Калісьці было складана ўявіць, што хрысціяне розных канфесій будуць маліцца адзін з адным»

Кіраўнік лютэранскай супольнасці ў Гродне нагадаў, што малітва аб еднасці хрысціян праходзіць ужо 49 разоў запар, «прадстаўнікі розных хрысціянскіх канфесій збіраюцца разам, каб яшчэ раз паразважаць над чарговым дэвізам, вершамі са Святога Пісання», «разам памаліцца».

«Бо калі глядзець гістарычна, то калісьці было складана сабе ўявіць, што хрысціяне розных канфесій будуць маліцца адзін з адным і адзін за аднаго, — дадаў пастар.

Але сёння мы ўжо бачым, што існуе і Сусветная Рада Цэркваў, і разнастайныя міжрэлігійныя дыялогі, праходзяць экуменічныя касцёльныя дні. Стала зразумела, што ў нас больш таго, што нас аб’ядноўвае, чым таго, што раздзяляе нас».

«Усвядоміць гэта дапамагае і свецкае асяроддзе, якое нас атачае, дыялог паміж канфесіямі ўжо пачынаецца ў нашых сем’ях. Сёння ў нашай краіне шмат сем’яў, у якіх сужэнцы належаць да розных хрысціянскіх канфесій, — нагадаў пастар. — І мы, у сваіх сем’ях, усе разам радуемся такім святам, як Божае Нараджэнне і Пасха, адзначаючы па двух календарах».

«У секулярызаваным грамадстве сумеснае сведчанне веры мае большую вагу»

«Калі казаць аб тым, ці патрэбна нам малітва аб еднасці хрысціян, напэўна, у ХХІ стагоддзі вельмі актуальна гаварыць пра неабходнасць маліцца разам.

Секулярызацыя ўскладняе тлумачэнне таго, што азначае вера. Многія людзі ў Еўропе і ва ўсім свеце адвярнуліся ад Касцёла. Назіраецца значная страта веры і традыцый. У многіх людзей больш няма ніякай сувязі з рэлігіяй. І сёння вельмі патрэбны сумесны, адзіны голас хрысціянскага Касцёла. І ў сумеснай малітве мы таксама можам вучыцца адзін у аднаго.

У секулярызаваным свецкім грамадстве сумеснае сведчанне веры з боку хрысціян мае большую вагу. Чым мацней будуць нашы сумесныя выступленні, тым хутчэй нас пачуюць», — выказаў думку пастар Уладзімір Татарнікаў.

Па словах лідара лютэранскай супольнасці, «для Беларусі малітва аб еднасці хрысціян таксама важная». «Калі паглядзець, што адбываецца вакол нашай краіны, то нам, хрысціянам Беларусі, трэба яшчэ мацней казаць аб еднасці і выступаць адзіным голасам у пытаннях маралі, сямейных і біблейскіх каштоўнасцяў, сумесна працаваць у дыяканіі», — адзначыў пастар.

(JM), (AG)