Выдавецтва Мінска-Магілёўскай архідыяцэзіі «Pro Christo» прымае ўдзел у XXIII Мінскай міжнароднай кніжнай выстаўцы-кірмашы, якая з 10 па 14 лютага праходзіць у сталіцы.

Вялікі плакат на стэндзе выдавецтва з выяваю абраза Езуса Міласэрнага нагадвае наведвальнікам, што 2016 год у Каталіцкім Касцёле прысвечаны Году Міласэрнасці. Таму галоўны акцэнт — кнігі і малітоўнікі, прысвечаныя Божай міласэрнасці. «Дзённік» святой сястры Фаўстыны Кавальскай у перакладзе на беларускую мову пісьменніцы Крыстыны Лялько — у цэнтры ўвагі наведвальнікаў.

Сярод новых выданняў — кніга кс. Яна Твардоўскага «Вазьмі свой крыж. Разважанні Крыжовага шляху» (пераклад на беларускую мову Ганны Шаўчэнка), выдадзеная да 100-гадовага юбілея Твардоўскага.

Увагу наведвальнікаў прыцягвае таксама каляровы дапаможнік катэхетычных заняткаў для 6 класа «Езус Хрыстус — Валадар і Збаўца» (аўтар с. Нунэ Цітаян MSF). Падручнік прысвечаны вывучэнню Новага Запавету, багата ілюстраваны творамі сусветна вядомых мастакоў, фотаздымкамі з жыцця Касцёла.

На стэндзе выдавецтва можна пабачыць і іншую кніжную прадукцыю, якая карыстаецца ў чытачоў найбольшай зацікаўленасцю. Кніга «Диалог как путь духовности в супружестве и не только», прысвечаная адносінам у сужэнстве і сям’і, прынцыпам дыялогу на аснове вучэння Хрыста, будзе карыснай усім, хто хоча пачуць і быць пачутым.

Выйшла таксама чарговая кніга з серыі рэкалекцыйных разважанняў а. Юзафа Аўгустына SJ «Дай мне пить» (папярэднія кнігі «Исцеление от чувства обиды» і «Адам, где ты?»). Гэтая кніга, як і папярэднія, адрасуецца ўсім тым, хто хоча заглыбіцца ў ігнацыянскую духоўнасць, дапаможа лепш пазнаць свой унутраны духоўны стан…

 Ганаровым госцем сёлетняй Мінскай міжнароднай кніжнай выстаўкі-кірмашу стала Арменія, якая прывезла ў Беларусь і свой галоўны экспанат — самую старую Біблію Арменіі, надрукаваную ў 1666 годзе.

Усяго ў ліку ўдзельнікаў выстаўкі — кнігавыдаўцы з 29 краін свету, у ліку якіх Венесуэла, Германія, Вялікабрытанія, Ізраіль, Карэя, Кітай, Польшча, ЗША, Фінляндыя, Украіна, Расія, Швейцарыя, Швецыя і інш.

XXIII Мінская міжнародная кніжная выстаўка-кірмаш будзе праходзіць да 14 лютага ў «Белэкспа» (пр. Пераможцаў, 14). Арганізатар — Міністэрства інфармацыі і Мінскі гарадскі выканаўчы камітэт.

(IL)
фота Міколы Новікава