Бібліятэка Ягелонскага ўніверсітэта выклала ў сеціва сканы часопіса для святароў «Wiadomości Archidiecezjalne Wileńskie».

У выданні друкаваліся пастановы Апостальскага Пасаду і Віленскай курыі, абмяркоўваліся душпастырскія пытанні, падаваліся навіны з мясцовага і замежнага жыцця Касцёла. Таксама публікаваліся падрабязныя і цёплыя ўспаміны аб святарах, якія ў той час адышлі ў лепшы свет.

Часопіс выдаваўся ў 1927-1939 гадах. На сайце даступны гадавікі часопіса за ўсе гады, акрамя 1932 і 1939, з агульным для гадавіка зместам. Гэтак зручна пампаваць і шукаць патрэбныя тэксты.

Выданне будзе карыснае для тых, хто цікавіцца гісторыяй рэлігійнага і грамадскага жыцця ў нашым краі ў міжваенны перыяд. Краязнаўцы з нашага рэгіёна знойдуць там шмат цікавага — даты будаўніцтва і асвячэння касцёлаў, прызначэння і пераводу святароў, біяграфічныя звесткі.

Каб спампаваць гадавую падшыўку ці асобны нумар, трэба адкрыць яго старонку на сайце бібліятэкі, а потым злева націснуць Download.

Аналагічнае выданне часоў Расійскай імперыі — «Dwutygodnik Dyecezalny Wileński» — якое выходзіла ў 1910-1915 гады, можна спампаваць на сайце Падляскай лічбавай бібліятэкі.

Westki.info (АлГ)