Пра гэта стала вядома пасля заканчэння кананічнай візітацыі ў салезіянскіх супольнасцях Беларусі, якія з 17 лютага па 5 сакавіка наведваў рэгіянальны настаяцель рэлігійнай каталіцкай місіі «Таварыства св. Францішка Сальскага» кс. Віктар Гайдукевіч SDB.

У выніку візітацыі было прынята шмат рашэнняў, сярод якіх стварэнне ў кожным салезіянскім араторыі Рады араторыя, якая будзе супрацоўнічаць з салезіянамі ў выхаваўча-душпастырскай працы.

Плёнам сустрэч з ужо існуючымі Радамі араторыяў і супольных разважанняў стаў імпульс для стварэння так званай Рады моладзі ў Дэлегатуры. Менавіта гэтая група павінна стаць «маторам» і ініцыятарам агульнабеларускіх салезіянскіх акцый і мерапрыемстваў для моладзі.

У духу братэрскай любові

Візітацыя паводле артыкулаў Канстытуцыі Таварыства — гэта момант братэрскай еднасці, сумеснага планавання душпастырска-выхаваўчай дзейнасці і час на асабістыя размовы з сабратамі дзеля больш эфектыўнай рэалізацыі салезіянскага паклікання на асабістым узроўні і на ўзроўні супольнасці.

Асаблівым момантам, на які звяртаў увагу рэгіянальны настаяцель падчас візітацыі, быў супольны клопат пра пакліканні і рэалізацыя харызмы кс. Боско ў месцах і сферах прысутнасці братоў салезіянаў.

Структура візітацыйных сустрэч была падобная ва ўсіх салезіянскіх супольнасцях і парафіях. Першым і важным момантам візітацыі ў супольнасцях з’яўляюцца асабістыя размовы з кожным сабратам.

Свае прапановы для лепшай фармацыі жыцця кожнай лакальнай супольнасці і павышэння эфектыўнасці ў яе душпастырска-выхаваўчай працы візітатар пакідае ў паслявізітацыйным пратаколе. 
Салезіяне ніколі не працуюць адны, але заўсёды стараюцца ствараць пастаральныя каманды для больш эфектыўнай працы і ахопу як мага большай колькасці моладзі.

Менавіта таму першымі і найважнейшымі супрацоўнікамі ў той жа харызме з’яўляюцца сёстры салезіянкі, дочкі Марыі Успамогі Хрысціянаў, якіх настаяцель наведваў у супольнасці імя святога Яна Боско ў Смаргоні і ў супольнасці імя Найсвяцейшай Панны Марыі Успамогі Хрысціянаў у Мінску.

Падчас сустрэч з сёстрамі абмяркоўвалася далейшае супрацоўніцтва ў выхаваўчай працы і былі вызначаны прыярытэтныя накірункі супрацоўніцтва на наступны год.

Моладзь як асноўны рухавік супольнасці

Асаблівай групай Салезіянскай сям’і з’яўляецца Аб’яднанне салезіянаў супрацоўнікаў — свецкія асобы, якія жывуць салезіянскім пакліканнем у сям’і, грамадстве і ў месцах салезіянскай прысутнасці, актыўна дапамагаючы працаваць у салезіянскай харызме дзеля дабра моладзі.

Менавіта салезіянам супрацоўнікам кс. Боско перадаў адказнасць у справе выхавання ў той жа меры, як і сваім духоўным сынам. Падчас сустрэч і дыскусій з імі, між іншым, абмяркоўвалася тэма духоўнай фармацыі і знешняга сведчання ў жыцці і рэалізацыі моладзевых праектаў.

Дзякуючы добрай дынаміцы ў групе, былі заснаваны і ўжо пачалі пачатковую фармацыю новыя групы кандыдатаў у Аб’яднанне. Так адбылося ў салезіянскай парафіі Унебаўзяцця Найсвяцейшай Панны Марыі ў Дзятлаве, якая належыць да салезіянскай супольнасці ў Смаргоні, а таксама ў салезіянскай супольнасці імя святога Дамініка Савіо ў Бараўлянах.

Паводле sdb.by (IL)