На святочныя дні найвялікшага свята хрысціян — Уваскрасення Збаўцы — каталіцкія біскупы Беларусі па традыцыі падрыхтавалі свае віншавальныя відэазвароты да вернікаў.

«Езус уваскрос, Езус жыве! З Ім жыве і наша Беларусь!» — радасна прамаўляе  Мітрапаліт Мінска-Магілёўскі Тадэвуш Кандрусевіч.

«Не стамляцца сведчыць аб надзеі, якая маецца ў нас ад Уваскрослага Хрыста», — заклікае біскуп Гродзенскі Аляксандр Кашкевіч.

Біскуп Пінскі Антоні Дзям'янка жадае ў сугуччы з абуджэннем прыроды абуджацца да веры, надзеі і любові Бога, а таксама да ўчынкаў міласэрнасці да бліжняга.

«Што трэба рабіць, каб выслужанае і падараванае мне збаўленне не было змарнавана, але прынесла багаты плён?» — звяртаецца з пытаннем біскуп Віцебскі Алег Буткевіч.

«Мужнасці і адвагі несці пасланне Міласэрнасці да тых людзей, якія яшчэ не ведаюць Хрыста», — жадае Апостальскі візітатар для грэка-католікаў Беларусі архімандрыт Сяргей Гаек.

Хрыстус уваскрос! Сапраўды ўваскрос!