IV Велікодная нядзеля – нядзеля Добрага Пастыра. У гэты дзень распачынаецца таксама Сусветны тыдзень малітваў аб святарскіх, законных i місійных пакліканнях да службы ў Касцёле, які будзе працягвацца з 17 па 23 красавіка.

Святы Ян Павел ІІ казаў, што «свету патрэбны святары, бо свету патрэбны Хрыстус». Таму, памятаючы гэтыя словы, Касцёл хоча ў гэты дзень маліцца аб тым, каб Пан скіраваў новых работнікаў на сваё жніво, каб у нашым Касцёле ў Беларусі ніколі не было недахопу ў адважных святарах і сёстрах законных, што будуць абвяшчаць Божае слова.

Езус кліча таго, каго захоча...

Тым, хто кліча, з’яўляецца заўсёды Бог. Гэта Ён дае сігнал, што жадае мець гэтага чалавека сваім супрацоўнікам. Езус кліча таго, каго захоча. Ён аўтаномны, цалкам свабодны ў сваіх намерах. Бог у гэтым сэнсе абсалютна адрозніваецца ад чалавека.

Таму Езус кліча святых і грэшнікаў, вельмі пабожных і абыякавых, тых, хто з дзяцінства служыць ля алтара, і тых, хто знаходзіцца ў баку нават ад самога Бога; выкарыстоўвае тых, хто, здаецца, не мае ніякіх талентаў (калі Майсей вагаўся перад пачаткам місіі, Бог даў яму на дапамогу брата Аарона; вялікі святы Ян Віянэй меў праблемы наогул з заканчэннем семінарыі), але не паграджае і такімі, каму ў свеце ўсё ўдаецца; кліча дасканалых і грэшных, абаронцаў Касцёла і тых, хто яго пераследуе.

Прыгожыя прыклады такога паклікання паказвае Святое Пісанне: там ёсць і мытнік Мацвей, і баязлівы Пётр, і вялікі пераследчык Касцёла Саўл, які пасля паклікання стаў руплівым апосталам Паўлам.

У гэтым не толькі спантаннасць, але і глыбіня думкі Бога, якая бясконца перавышае думкі чалавека. Кожны можа быць пакліканы да служэння Богу. Для Езуса гэта не з’яўляецца праблемай.

«Жніво сапраўды вялікае, ды работнікаў мала; таму прасіце Гаспадара жніва, каб паслаў работнікаў на жніво сваё» (Mц 9, 37-38).

Запрашэнне да малітвы ў інтэнцыі пакліканняў, зробленае больш за 20 стагоддзяў таму Езусам Хрыстом, застаецца актуальным у кожным часе і прасторы.

... патрэба ў адважных вестунах Слова

Сённяшняму Касцёлу і свету патрэбны людзі, якія будуць сапраўды здольнымі адказаць на гэтую дзівосную любоў Бога, адказаць пакорна і з даверам на Божы голас, падобна як адказаў малады Самуэль: «Кажы, бо слухае слуга Твой» (1 Сам 3, 10).

Сёння існуе патрэба ў маладых людзях, поўных ідэалізму і адрытасці на штосьці тое, што пераступае парог надзеі. Патрэба ў святарах і кансэкраваных асобах, якія будуць сведкамі Божай праўды і Божай любові, сведкамі Езуса Хрыста – Добрага Пастыра.

У сённяшнія часы вельмі патрэбна малітва аб пакліканнях. Пакліканнях да жыцця, цалкам прысвечанага Богу. Пакліканнях да жыцця ў вернасці да канца, каб быць бачным знакам для свету. Знакам, які так моцна патрэбны свету.

Калі хтосьці разумее, як моцна кансэкраваныя асобы патрэбны для збаўлення свету, як моцна чалавецтву патрэбны святары, то будзе прасіць аб іх Пана.

Бог ахвотна выслухае такую малітву, бо яна выражае просьбу аб вялікім дабры, якім з’яўляецца святарства і адданне сябе Богу праз кансэкраванае жыццё.

Таму будзем жа горача маліцца аб новых пакліканнях да службы ў Касцёле, каб не было ў нас недахопу ў тых, хто будзе нас карміць Божым словам і Найсвяцейшым Целам Хрыста, каб Гаспадар жніва паслаў работнікаў на жніво нашай зямлі, жніво нашай краіны.

Кс. Юрый Марціновіч