Незабыўны валанцёрскі вопыт атрымалі навучэнцы Вышэйшай духоўнай семінарыі ў Гродне падчас семінара, які прайшоў у цэнтры «Caritas» Мінска-Магілёўскай архідыяцэзіі.

Дзякуючы насычанай практычнай частцы праграмы ўдзельнікі семінара пазнаёміліся з асновамі валанцёрства на досведзе працы Мальтыйскай службы сацыяльнай дапамогі з Германіі. Семінарысты вучыліся даглядаць хворых, аказваць першую медыцынскую дапамогу, практыкавацца ў розных формах творчых заняткаў з дзецьмі і шмат чаму іншаму.

Супольнасць Вышэйшай духоўнай семінарыі ў Гродне ўдзячная ўсім арганізатарам семінара за магчымасць чэрпаць каштоўны вопыт валанцёрства ад сапраўдных прафесіяналаў служэння бліжнім, які вельмі патрэбны семінарыстам на шляху да святарства.