27 кастрычніка 2009 г. Святы Айцец Бэнэдыкт XVI павіншаваў Католікоса Армянскай Апостальскай Царквы Гарэгіна ІІ з 10-годдзем абрання на пасаду Патрыярха Армянскай Царквы. У віншаванні Пантыфік адзначыў важнасць паглыблення паяднання паміж Каталіцкім Касцёлам і Армянскай Апостальскай Царквой.

Святы Айцец таксама выказаў падзяку Патрыярху Гарэгіну ІІ за яго плённы ўдзел у дыялогу Армянскай Апостальскай Царквы з Касцёлам. Варта адзначыць, што ў 2001 г. Патрыярх сустракаўся з папам Янам Паўлам ІІ. Выказваючы сваё пажаданне, каб усталяваныя паміж Цэрквамі цёплыя адносіны развіваліся далей, Бэнэдыкт XVI падкрэсліў таксама вялікі ўнёсак Патрыярха ў справу адраджэння хрысціянства ў Арменіі. Патрыярх Гарэгін ІІ у сваёй дзейнасці надаў вялікую ўвагу адукацыі моладзі, стварэнню ў краіне новых парафій, сцвярджэнню высокага звання хрысціяніна.

Гарэгін ІІ (Нерсесян) нарадзіўся ў 1951 г. у армянскай вёсцы Васкехат. У 1971 г. скончыў духоўную семінарыю ў Арменіі. У 1972 г. прыняў святарскае пасвячэнне. Працягваў вучобу ў Боне (Германія). У 1980 г. стаў святаром у епархіі Арарат Армянскай Апостальскай Царквы. У 1983 г. быў узведзены ў сан епіскапа, а пазней — архіепіскапа. Шмат зрабіў у справе аднаўлення Арменіі пасля землятрусу 1988 г., а таксама ў справе духоўнага адраджэння краіны ў постсавецкі перыяд. У 1999 г. архіепіскап Гарэгін быў абраны на пасаду Патрыярха Армянскай Апостальскай Царквы.  

Арменія з’яўляецца першай краінай у свеце, дзе хрысціянская рэлігія была аб’яўлена дзяржаўнай. Гэта адбылося ў IV ст. Сапраўдная хрысціянізацыя распачалася ў краіне з таго часу, як св. Грыгорый Свяціцель, навярнуўшы да хрысціянскай веры караля краіны, стаў першым епіскапам Арменіі. Усталяванню ў краіне хрысціянства садзейнічалі і апосталы св. Юда Тадэвуш і св. Барталамей, якія знаходзіліся на Каўказе ў 43–46 і 60–68 гг. і загінулі там мучаніцкай смерцю. Старажытнае паходжанне Армянскай Царквы выяўляецца ў слове «Апостальская», што прысутнічае ў назве. Да назвы дадаецца таксама слова «Грыгарыянская», што выражае пашану, якую вернікі Царквы аддаюць святому Грэгору.

Да 368 г. Армянская Царква фактычна адносілася да мітраполіі Цэзарыі Кападакійскай, якая да ўсталявання Канстантынопальскага Патрыярхату была галоўным асяродкам улады ва Усходняй Царкве. У 368 г., дзякуючы дэкрэту ўладара Арменіі, Апостальская Царква ў гэтай краіне атрымала незалежнасць. На працягу стагоддзяў Царква была галоўным інстытутам, які аберагаў культурныя, цывілізацыйныя і рэлігійныя каштоўнасці армянскага народа.

У апошні час адной з найбольш выдатных постацяў у Армянскай Апостальскай Царкве быў Патрыярх Вазген І, які знаходзіўся на пасадзе кіраўніка Царквы 40 год. Падчас свайго патрыярхату, які праходзіў у асноўным у савецкі перыяд, Патрыярх здолеў кіраваць Царквой сумленна і разважліва, забяспечыўшы ёй сусветнае прызнанне. У 1970 г. Патрыярх наведаў Апостальскую Сталіцу, дзе сустрэўся з папам Паўлам VI.

Армянскія хрысціянскія вернікі належаць да ўсходняй традыцыі, аднак іх супольнасць не з’яўляецца Праваслаўнай Царквой.