У межах прабывання ў Арменіі старшыня Папскай рады спрыяння хрысціянскаму адзінству кардынал Курт Кох 26 верасня 2012 г. сустрэўся з Прэзідэнтам краіны Сержам Саргсянам. Па інфармацыі прэзідэнцкай Прэс-службы, лідар краіны выказаў вялікую задаволенасць з прычыны візіту іерарха, назваўшы гэта сведчаннем добрых адносінаў паміж Арменіяй і Ватыканам.

Па словах Сержа Саргсяна, Арменія, як першая краіна, якая прызнала хрысціянства ў якасці афіцыйнай рэлігіі, вельмі цэніць міжнародную ролю Апостальскай Сталіцы не толькі з-за яе місіі на карысць міру і талерантнасці, але і таму, што Святы Пасад служыць кансалідацыі хрысціянскага свету.

У гэтым кантэксце Прэзідэнт Арменіі ўзгадаў свой мінулагодні візіт у Ватыкан і сустрэчу з Папам. Як падкрэсліў Серж Саргсян, доўгія ўзаемныя адносіны і агульная духоўная і культурная спадчына «абавязваюць нас да падтрымкі гэтых адносінаў на найвышэйшым узроўні».

Са свайго боку кардынал Курт Кох высока ацаніў здольнасць Арменіі захаваць свае шматвяковую хрысціянскую традыцыю. Іерарх нагадаў пра сваю нядзельную сустрэчу з Каталікосам Гарэгінам ІІ і падкрэсліў добрыя адносіны, якія злучаюць Апостальскую Сталіцу з Армянскай Царквой.

(AG)