«Няхай мне станецца паводле Твайго слова» —  гэта назва афіцыйнага гімну 34-х Сусветных дзён моладзі-2019 у Панаме, прэзентаванага 3 ліпеня арганізатарамі сустрэчы моладзі ў сталіцы Панамы падчас штогадовай сустрэчы «Вячэра Хлеб і Віно».

Аўтарам тэксту і музыкі абранага гімну стаў Абдыэль Хімэнэс з Панамы. Яго версія была абрана сярод 56 варыянтаў.

Абдыэль Хімэнэс — катэхет і кантар ў парафіі Хрыста Уваскрослага ў Сан Мігэліта. Хімэнэс з’яўляецца таксама аўтарам многіх рэлігійных і эўхарыстычных песень, удзельнікам хору і выпускніком факультэта рэлігійных навук Каталіцкага ўніверсітэта Санта Марыя ля Анцігуа ў Панаме.

Першая версія гімну была запісана ў супрацы з музычнымі прадзюсарамі Карласам Саманьега і Рыкі Рамірэзам.

Змяшчаем беларускую версію гімна

«Няхай мне станецца паводле Твайго слова»

Мы пілігрымы, якія прыбываюць сёння сюды,
З (са шматлікіх) кантынентаў і гарадоў.
Хочам быць місіянерамі Пана,
Прыняць Яго слова і Яго пасланне.

Жыць як Марыя, якая аднойчы адказала: ТАК
на заклік да Твайго плану.
Неба цешыцца і спявае радасна,
Уся зямля праслаўляе Твае справы.

Прыпеў: Вось Я слуга Пана, няхай мне станецца паводле Твайго слова.

Тваёй слугою я з’яўляюся,
Тваёй дачкою я з’яўляюся,
Тваім сынам я з’яўляюся.

Жыць як Марыя, гатовая вырушыць.
Касцёл пілігрымуе з любоўю.
Моладзь, сведкі і вучні,
З радасцю, верай і пакліканнем.

Прыпеў: Вось Я слуга Пана, няхай мне станецца паводле Твайго слова.

Не бойцеся, не,
Не бойцеся
Прыняць любоў Бога.

Занятыя так, як Марыя,
Якая ведала, што з’яўляецца слугою Пана

(Пераклад, змешчаны вышэй, з’яўляецца даслоўным перакладам з польскай мовы)

«Словы гімну — простыя, а мелодыя лёгка запомніць»

Гімн быў выбраны сярод 56 варыянтаў, атрыманых арганізацыйным камітэтам у межах аб’яўленага конкурса, які стартаваў 20 студзеня. Арганізатары СДМ выбралі 3 найлепшыя творы і прэзентавалі іх Дыкастэрыі па справах свецкіх, сям’і і жыцця, сумесна з якой і зрабілі канчатковы выбар.

Падчас СДМ-2016 у Кракаве, фота Марыны Валасар/catholic.by 

«Мы шукалі твор, які як найлепш адлюструе тое, чым з’яўляецца Касцёл, а таксама нагадае заклік папы Францішка на бліжэйшыя СДМ», — дадаў генеральны сакратар аргкамітэту СДМ у Панаме Біктар Чанг Гансалес.

«Словы гімну — простыя, а мелодыя лёгкая для запамінання, — падкрэсліў Гансалес. — Хоць ў ім дастаткова лаціна-амерыканскіх рытмаў, мы выбралі яго не толькі з думкай пра наш рэгіён, але пра ўвесь свет».
Чанг выказаў надзю, што новы гімн працягне традыцыю папярэдніх гімнаў і дапаможа моладзі ва ўсім свеце з’яднацца ў малітве і чаканні сустрэчы ў Панаме. «Мы спадзяёмся, што гэты гімн будзе спяваць моладзь ва ўсім свеце на ўсіх мовах. І што ён дапаможа моладзі стаць, як Марыя, — слугою Пана», — сказаў Гансалес.

Прома-ролік да СДМ-2019 у Панаме

Афіцыйная прэм’ера гімну «Няхай мне станецца паводле Твайго слова» адбылася падчас 47-й сустрэчы «Вячэры Хлеб і Віно», у якой прымалі ўдзел арганізатары. Падчас урачыстасці Апостальскі нунцый у Панаме Андрэс Караскоса Коса атрымаў ад прэзідэнта сталіцы Панамы ключы горада, як сімвал прысвячэння сталіцы патрэбам Касцёлу і арганізатарам сустрэчы моладзі з усяго свету.

Міжнародная версія? coming soon

Згодна з традыцыяй, гімн сустрэчы моладзі служыць падрыхтоўкай да СДМ ва ўсім свеце. Маладыя пілігрымы моляцца супольна словамі гімну таксама падчас галоўных урачыстасцей СДМ.

Падчас СДМ-2016 у Кракаве, фота Аксаны Ючкавіч/catholic.by

Як правіла, арганізатары СДМ у супрацоўніцтве з адказнымі Канферэнцыямі біскупаў рыхтуюць моўную версію гімну СДМ на афіцыйных мовах сустрэчы. Паводле апошніх звестак, арганізатары ўжо распачалі працу над міжнароднай версіяй гімну.

Таксама па тэме:

• У Панаме прадставілі афіцыйны лагатып СДМ-2019
• У цэнтры ўвагі на СДМ у Панаме будзе марыйная тэматыка і экуменічны акцэнт 
  

Адказныя за падрыхтоўку да СДМ у іншых краінах перашлюць арганізатарам уласныя моўныя версіі, якія пасля будуць выкарыстаны ў сумеснай малітве падчас галоўных урачыстасцей.

Беларусы падчас СДМ-2016 у Кракаве, фота Марыны Валасар/catholic.by

Цэнтральныя ўрачыстасці 34 Сусветных дзён моладзі ў Панаме-2019 адбудуцца 22-27 студзеня 2019 года пад дэвізам «Вось я слуга Пана, няхай мне станецца паводле твайго слова» (Лк 1, 38). Папярэднічаць ім будуць дні моладзі ў дыяцэзіях, якія пройдуць 17-21 студзеня 2019 года на тэрыторыі Панамы, Коста-Рыкі і Нікарагуа.

(kai/cath/il)