Больш за 2 мільёны вернікаў з усяго свету прымалі ўдзел у 2009 г. у папскіх аўдыенцыях і святых Імшах, якія цэлебраваў Святы Айцец Бэнэдыкт XVI у Апостальскай Сталіцы і Кастэль Гандольфа (прыгарад Рыма). Прэфектура папскага дому дала статыстычныя даныя адносна ўдзелу вернікаў у сустрэчах з Пантыфікам за мінулы год, не лічачы падарожжаў Папы па Італіі і ў іншыя краіны.

Згодна са статыстычнымі данымі, у агульных аўдыенцыях у 2009 г. удзельнічала 537 500 чалавек, у спецыяльных аўдыенцыях — 115 600 чалавек, у літургічных набажэнствах з удзелам Папы — 470 800 чалавек, у малітве «Анёл Панскі» — 1 120 000 чалавек.

Рэкордная колькасць чалавек прымала ўдзел у агульных аўдыенцыях у красавіку (130 тысяч) і кастрычніку 2009 г. (71 тысяча). Гэта тлумачыцца тым, што ў дадзеныя месяцы адзначаліся гадавіна абрання Яна Паўла ІІ на Папскі пасад і гадавіна смерці Вялікага Папы. У цэлым у Апостальскай Сталіцы з Бэнэдыктам XVI сустрэліся 2 243 900 пілігрымаў.