Выдадзены фотаальбом да 5-й гадавіны Пантыфікату Бэнэдыкта XVI

Святы Айцец

16.04.2010 11:09

Да пятай гадавіны Пантыфікату Святога Айца Бэнэдыкта XVI афіцыйнае выдавецтва Апостальскай Сталіцы «Libreria Editrice Vaticana» выпусціла фотаальбом з каментарыямі асабістага сакратара Папы монсеньёра Георга Генсвайна. 16 красавіка 2010 г. Пантыфік адзначае 83-і дзень нараджэння, а 19 красавіка споўніцца пяць год з таго моманту, як кардынал Ёзаф Ратцынгер быў абраны Папам. У выданні змешчана каля 300 фатаграфій, якія адлюстроўваюць дзейнасць Бэнэдыкта XVI на працягу гэтых гадоў. Выдаўцы сцвярджаюць, што большасць фотаздымкаў публікуецца ўпершыню. Для каментарыяў фота монсеньёр Генсвайн выкарыстаў запісы з асабістага дзённіка. Перад публікацыяй яны былі паказаны Пантыфіку і не выклікалі пярэчанняў адносна абнародвання.