Святы Айцец Бэнэдыкт XVI выказаў падзяку біскупам англамоўных краін за ўнёсак, які яны зрабілі ў новае тлумачэнне Рымскага Імшала. 28 красавіка 2010 г. Папа сустрэўся з членамі камітэта «Vox Clara», які займаецца пытаннямі цэлебрацыі літургіі лацінскага абраду на англійскай мове. На чале камітэта, падпарадкаванага Кангрэгацыі Божага Культу і Дысцыпліны Сакрамэнтаў, стаіць кардынал Джордж Пэлл з Сіднэя ў Аўстраліі.

Бэнэдыкт XVI падзякаваў камітэту за васьмігадовую працу над тлумачэннем Імшала, адзначыўшы, што ў ёй прымалі ўдзел прадстаўнікі ўсіх кантынентаў. Тэкст тлумачэння будзе апублікаваны ў хуткім часе.

Святы Айцец заахвоціў біскупаў, каб яны рыхтавалі духавенства і вернікаў да ўспрыняцця новага тлумачэння. Пантыфік дадаў, што для многіх людзей, якія прывыклі да 40-гадовага існавання ранейшага тэксту, гэта можа быць нялёгка. Папа падкрэсліў, што падрыхтоўка павінна суправаджацца катэхезай. Папа выказаў пажаданне, каб новае тлумачэнне Рымскага Імшала служыла аднаўленню і паглыбленню эўхарыстычнай пабожнасці ва ўсіх англамоўных краінах.