«Забойства біскупа Луіджы Падавезэ не мае нічога агульнага і не можа быць прыпісана Турцыі і яе жыхарам, а таксама не павінна кідаць які-небудзь цень на дыялог з ісламам», — адзначыў Святы Айцец Бэнэдыкт XVI падчас прэс-канферэнцыі па дарозе на Кіпр, 4 чэрвеня 2010 г.

Папа заклікаў усіх хрысціян імкнуцца развіваць дыялог з мусульманамі — «нашымі братамі, нягледзячы на цяжкасці».

Па словах Пантыфіка, кожны дзень варта «наследаваць Бога ў Яго цярплівасці». Як дадаў Папа, задачай Апостальскай Сталіцы з’яўляецца стварэнне ў чалавечых сэрцах гатоўнасці да распачацця аднаўлення, з упэўненасцю, што насілле не сродак вырашэння праблем. Гаворачы аб пасяджэнні Спецыяльнага Сіноду Біскупаў для Блізкага Усходу, якое адбудзецца 10–24 кастрычніка гг. у Ватыкане, Святы Айцец выказаў пажаданне, каб мерапрыемствы Сіноду ўзмацнілі дыялог паміж хрысціянамі, а таксама супольную здольнасць да дыялога з братамі мусульманамі.