Аб укладзе веры ў развіццё грамадства, абароне каштоўнасці чалавечага жыцця і сям’і і аб значэнні хрысціянскіх каранёў Еўропы казаў Святы Айцец Бэнэдыкт XVI падчас сустрэчы з новымі пасламі Партугаліі, Славеніі і Эквадора ў Ватыкане. 22 кастрычніка 2010 г. Папа ўдзяліў паслам аўдыенцыі.

Звяртаючыся да пасла Эквадора Луіса Латорэ Тапіі, Пантыфік нагадаў, што ў 1978 г. наведваў гэтую краіну як пасланец папы Яна Паўла ІІ. Святы Айцец указаў на значэнне рэлігіі для развіцця асобы і грамадства і падкрэсліў, што Касцёл не імкнецца да атрымання прывілеяў, а прагне толькі ўнесці свой уклад у інтэгральнае развіццё асобы.

Па словах Папы, гісторыя вучыць нас, што занядбанне праўды пра чалавека, створанага па Божым вобразе і падабенстве, часта вядзе да несправядлівасці і таталітарызму. Калі ж, наадварот, дзяржава прызнае гэтую праўду, свабода жыхароў і іх удзел у грамадскім жыцці ўзмацняюцца. Таму неабходна пашана чалавечага жыцця ў кожнай яго стадыі, рэлігійнай свабоды, сям’і, пабудаванай на сужэнстве мужчыны і жанчыны. Пантыфік дадаў, што душпастыры Касцёла не павінны ўступаць у палітычныя дэбаты, прапануючы канкрэтныя вырашэнні, аднак яны не могуць заставацца абыякавымі перад абліччам важных праблем.

Святы Айцец адзначыў вялікі ўклад Касцёла ў Эквадоры ў справу адукацыі моладзі і заахвоціў жыхароў краіны да абароны натуральнага хараства іх айчыны.

Звяртаючыся да пасла Партугаліі Мануэля Фернандэса Перэйры, Папа ўзгадаў свой візіт у краіну, які адбыўся ў маі гг., падкрэсліў зацікаўленасць Апостальскай Сталіцы ў інтэгральнай падтрымцы асобы і народаў, адзначыўшы, што перашкоды на гэтым шляху часта здараюцца з-за забыцця маральных і духоўных каштоўнасцяў.

Бэнэдыкт XVI нагадаў, што Касцёл па сваёй прыродзе не павінен атаясамліваць сябе з нейкай пэўнай формай культуры або палітычнай, эканамічнай ці грамадскай сістэмай. Толькі ў сваёй універсальнасці ён становіцца наймацнейшай сувяззю паміж супольнасцямі і народамі, калі яны яму давяраюць і прызнаюць сапраўдную свабоду ў выкананні ім сваёй місіі, якая мае рэлігійны і маральны характар.

Існаванню Славеніі ў складзе Еўрасаюза прысвяціў Пантыфік сваю сустрэчу з паслом краіны Маяй Марыяй Светэк. Нагадваючы аб хрысціянскіх каранях Еўропы, Папа заўважыў, што ўмацаванне Славеніі ў евангельскіх каштоўнасцях у вялікай меры паспрыяла яе развіццю. Як адзначыў Святы Айцец, нават у цяжкія хвіліны гэтая духоўная спадчына несла народу краіны суцяшэнне і надзею.