28 сакавіка 2011 г. Святы Айцец сустрэўся з кіраўніком Праваслаўнай Царквы Кіпра архіепіскапам Хрызастомам ІІ. Падчас сустрэчы былі закрануты пытанні рэлігійнай свабоды і сітуацыі хрысціян на Блізкім Усходзе.

Сёння архіепіскап Хрызастом ІІ сустрэўся з Дзяржсакратаром Яго Святасці кардыналам Тарчызіо Бэртонэ. Аб гэтым паведамляе беларуская рэдакцыя Ватыканскага радыё.

Запланаваны сустрэчы архіепіскапа са старшынёй Папскай рады спрыяння хрысціянскаму адзінству кардыналам Куртам Кохам і кардыналам Леанарда Сандры, прэфектам Кангрэгацыі па справах Усходніх Касцёлаў. Кіраўнік Праваслаўнай Царквы Кіпра наведае таксама Папскую раду па культуры і Папскую раду па міжрэлігійным дыялогу, і сустрэнецца з яе кіраўнікамі.

Гэта была ўжо трэцяя сустрэча Бэнэдыкта ХVI з архіепіскапам Хрызастомам ІІ. Першая прайшла ў 2007 г. у Ватыкане, а другая — у 2010 г. на Кіпры, калі Папа знаходзіўся там з апостальскім візітам.