Цярпліва шукаць аблічча Бога заахвоціў Святы Айцец Бэнэдыкт XVI студэнтаў вышэйшых навучальных установаў Рыма. Традыцыйна за некалькі дзён да Божага Нараджэння, сёлета 15 снежня, Папа сустрэўся са студэнтамі Вечнага горада ў ватыканскай базыліцы.

Святы Айцец прапанаваў паразважаць над словамі з Паслання св. Апостала Якуба, у якіх Апостал заахвочвае цярпліва трываць ажно да прыйсця Пана. Па словах Пантыфіка, сёння многія людзі пытаюцца, ці варта верыць у Дзіцятка, якое ў ноч Божага Нараджэння знаходзім у стаенцы. Заахвочванне Апостала да цярплівага трывання — шлях да глыбокага прыняцця Бога, значэння, якое Ён надае жыццю і гісторыі.

«Мы не патрабуем бога агульнага і неакрэсленага, але Бога жывога і сапраўднага, які адкрывае гарызонт будучыні чалавека на перспектыву моцнай і пэўнай надзеі», — адзначыў Папа. Словы св. Якуба нагадваюць нам, што Бог не далёка ад чалавека — Ён схіліўся над ім і прыняў чалавечае цела, каб чалавек зразумеў, што ў Хрысце знаходзіцца аснова ўсяго.

Як дадаў Пантыфік, часта людзі імкнуліся будаваць гісторыю без Бога або супраць Бога. Гэта выклікала драму ідэалогіі, якая ў выніку аказалася скіравана супраць чалавека і яго годнасці. Бэнэдыкт XVI заахвоціў рымскіх студэнтаў змагацца з усімі цяжкасцямі разам з Хрыстом, яднаючы веру і культуру. Пошук Хрыста — гэта, па словах Папы, глыбокае імкненне чалавечага сэрца і адказ на фундаментальныя пытанні, якія з’яўляюцца ў сучасным грамадстве.

Пантыфік пажадаў студэнтам «несці ўсім вестку, што праўдзівае аблічча Бога — у Дзіцятку з Бэтлеема, такім блізкім кожнаму з нас, што ніхто не можа адчуваць сябе выключаным».