21 мая ў Герцагскай зале Апостальскага палацу ў Ватыкане адбыўся ўрачысты абед Бэнэдыкта XVI з членамі Калегіі кардыналаў. Такім чынам Святы Айцец хацеў падзякаваць сваім найбліжэйшым супрацоўнікам за віншаванні, якія атрымаў з нагоды свайго 85-годдзя.

Звяртаючыся да прысутных, Пантыфік прапанаваў паразважаць над паняццем «Ecclesia militans» — «Касцёл-змагар». Папа нагадаў, што сёння зло адкрыта імкнецца «дамінаваць у свеце», і таму неабходна ўвайсці з ім у барацьбу.

«Мы бачым, што гэта барацьба ажыццяўляецца па-рознаму, жорсткімі і часам гвалтоўнымі метадамі, замаскіраванымі пад дабро і менавіта таму разбуральнымі для фундаментаў маралі ў грамадстве», — прыводзіць словы  Бэнэдыкта XVI  Ватыканскае радыё.

Пантыфік нагадаў словы св. Аўгустына аб тым, што ў гісторыі існуе пастаянная барацьба паміж двума відамі любові: любоўю да сябе і любоўю да Бога, якая характарызуецца поўным самаадданем аж да мучаніцтва.

«Вы мае сябры і я адчуваю сябе як дома, я адчуваю сябе ў кампаніі вялікіх сяброў, якія заўсёды побач са мной, мы ўсе разам і з Панам», — прамовіў Святы Айцец да кардыналаў.

«Мы „каманда” Пана, гэта значыць — „каманда” пераможцаў!”» — дадаў Святы Айцец.