Трэцяя і заключная кніга трылогіі Бэнэдыкта XVI пра жыццё Езуса з’явіцца ў кнігарнях Германіі, Аўстрыі і Швейцарыі 21 лістапада. Твор прысвечаны дзяцінству Езуса і рыхтуецца да друку выдавецтвам Herder у Фрайбургу. Як заявіў 18 кастрычніка прадстаўнік выдавецтва, канчатковы варыянт дакладнай назвы нямецкамоўнага варыянта кнігі яшчэ не зацверджаны.

Абвешчана, што кніга будзе перакладзена на 20 моваў свету. Правы на пераклад твора кнігарня Ватыкана перадала італьянскаму выдавецтву «Рыдзолі». Адначасова «Рыдзолі» апублікавала першыя вытрымкі нямецкага тэкста з кнігі, напісанай Папам.

«Нарэшце я магу перадаць у рукі чытачоў маленькую, даўно абяцаную кнігу пра дзяцінства Езуса», — цытуе прадмову папскай кнігі каталіцкае агенцтва Аўстрыі. — Езус нарадзіўся не ў невядома якім месцы ці рэчаіснасці, а „ў дакладны час і геаграфічна дакладнай рэчаіснасці“. Езус прыйшоў у свет, будучы сэнсам усіх рэчаў. Хрысціянская вера звязана з дадзенай рэальнасцю, бо Езус пераадолеў часавую і геаграфічную прастору», — гаворыцца ў апублікаванай вытрымцы з тэкста.

Першая кніга Бэнэдыкта XVI пра Езуса, апублікаваная ў 2007-м годзе, ахоплівае перыяд ад хросту Езуса ў Ярдане да Яго Перамянення. Другая кніга распавядае пра пакуты, укрыжаванне і ўваскрасенне Хрыста. Другая кніга выйшла ў свет у сакавіку 2011 года.

 

(JLS)